Qurban Qurbanov: "Həmişə dua edirəm ki, Qarabağ qayıtsın"

2017-09-27 18:11:13 / 2073 dəfə oxunub

"Qarabağ"ın baş məşqçisi Qurban Qurbanov italiya mətbuatına eksklüziv müsahibə verib.

Sabahinfo.az qafqazinfo-ya istinadənhəmin müsahibəni təqdim edir:

- Sürgündə olan klub üçün Avropada uğurlar nə deməkdir?

- Bir azərbaycanlı kimi mənim üçün bu barədə danışmaq çətindir. Bildiyiniz kimi bizdə bir milyondan çox qaçqın var və ərazimizin bəzi hissələri düşmənlər tərəfindən işğal edilib. Amma mən bu yaralı bölgənin klubunda fəxrlə, məsuliyyətlə işləyirəm. Heç zaman öz məsuliyyətimi unutmaram. Həmişə öz vətənini, evlərini tərk edən insanları düşünürəm.

- Ağdamda olmusunuzmu?

- Əlbəttə. Orada olmuşam. Amma müsahibədə bu barədə duyğularımı ifadə edə bilmərəm. Ora çox gözəl şəhər idi. Bunu ancaq öz gözlərinizlə görməlisiniz. Məni incidən odur ki, bu yerləri ziyarət edə bilmirik.

- Niyə Quzanlıda oynamırsınız?

- Biz ötən mövsümlərdə orada oynadıq. Əgər bu mənimlə bağlı olsaydı, daha çox Quzanlıda olardım. Amma təəssüf ki, futbol şəraiti xoş deyil. Bu səbəbdən Bakıda oynamaq məcburiyyətindəyik.

- Azarkeşlər üçün yaxşı olmazdımı?

- Bunu bilirik. Amma vəziyyət əlverişli deyil. İnsanlar bu komandanı sevirlər, onunla yaşayırlar.

- Bir gün təkrar Ağdama qayıdacağınızı düşünürsünüz?

- Ümidlə yaşamaq həmişə vacibdir. Allaha həmişə dua edirəm ki, Qarabağ geri qayıtsın.

- Çempionlar Liqasının qrup mərhələsi sizin üçün nə deməkdir?

- Avropanın ən nüfuzlu klub turniridir. Ən yaxşı klublar, ən yaxşı oyunçular, ən yaxşı məşqçilər burada yer alır. Biz bildiyiniz kimi kiçik bir futbol ölkəsiyik. Bu yarışda ölkəmizi və işğal olunmuş şəhərləri təmsil etmək qürurdur.

- "Chelsea"yə 0:6 hesablı məğlubiyyəti necə şərh edərdiniz?

- "Qarabağ"la "Chelsea" arasında böyük fərq var. Amma yekun hesab fərqli ola bilərdi. Bu turnirdə ilk oyunumuz idi və təcrübəmiz üçün yüksək qiymət verdik. "Atletico" da "Chelsea" kimi böyük komandadır. Yaxşı məşqçilər, oyunçular və yaxşı oyun tərzi var. Əslində biz çox güclü rəqiblə qarşılaşacağıq. "Roma" haqqında isə heç nə demirəm. Bütün heyətdəki oyunçular güclüdür.

- Tottisiz "Roma"nın ilk mövsümünü necə təsvir edərdiniz?

- Totti ən yaxşılardan biri idi. Veteran olmasına baxmayaraq "Roma"nı onsuz təsəvvür etmək çətindir.

- "Qarabağ"ın azad edilməsi üçün hansı işlər görülür?

- Mən siyasətdən uzaq bir insanam. Bir şeyi bilirəm ki, ölkəmizin prezidenti İlham Əliyev işğal olunmuş torpaqları geri qaytarmaq üçün çox səy göstərir. Bəzi ölkələr də bundan narahatdır. Azərbaycan vətəndaşları olaraq biz də ÇL-də ölkəmizi təmsil etmək üçün hər şeyi edəcəyik. Bu ərazilər Azərbaycana aiddir. Bir də görürəm ki, işğal olunmuş ərazilərimiz haqqında sizin də kifayət qədər məlumatınız var. Bunun üçün sizə təşəkkür edirəm. Ümumiyyətlə, mən dünyada sülhün olmasının tərəfdarıyam.


Son xəbərlər
Bütün hüquqlar qorunur: © Copyright 2016-2019 SabahInfo.az Müstəqil İnformasiya Agentliyi
Ünvan: Bakı şəhəri, Azərbaycan Nəşriyyatı, 9-cu mərtəbə
Tel: (994 55) 440 34 97
Tel: (994 55) 627 08 25

E-mail: [email protected]
Baş Redaktor: Ədilzadə Ədil Tahir oğlu
DİQQƏT!!! Materiallardan istifadə edərkən SabahInfo.az Müstəqil İnformasiya Agentliyinə istinad zəruridir !!!