“Laçın şəhərinin bir güllə atılmadan azad edilməsi tarixi hadisədir”

“Laçın şəhəri kimi strateji şəhərin bir güllə atılmadan, şəhid vermədən azad edilməsi Prezident İlham Əliyevin böyük xidməti və siyasi-diplomatik qələbəsi, tarixi hadisədir”. Bunu APA-ya açıqlamasında politoloq Ramiz Alıyev bildirib.
Ramiz Alıyev qeyd edib ki, işğal dövründə bütün təzyiqlərə rəğmən Azərbaycan xalqı sınmadı, mətinliyini, mübarizliyini qorudu. 2016-cı ilin aprel və 2020-ci ilin iyul döyüşlərində, Vətən müharibəsində, 2022-ci ilin sentyabr döyüşlərində Vətənə sonsuz sədaqət və məhəbbətlə bağlanan Azərbaycan övladlarının düşməni heyrətləndirən misilsiz qəhrəmanlıq nümunələri yaratdı: “Müzəffər Ali Baş Komandan, Prezident İlham Əliyevin rəhbərliyi ilə və qəhrəman əsgər və zabitlərimizin fədakarlığı sayəsində torpaqlarımız azad edildi. Kapitulyasiyaya imza atmağa məcbur olan Ermənistan Ağdam, Kəlbəcər və Laçından qoşunlarını çıxarmağa razılaşdı. Prezident İlham Əliyevin digər işğaldan azad edilən torpaqlarımızda olduğu kimi Laçında da üçrəngli müqəddəs bayrağımızı qaldırması çox önəmli bir hadisə idi. Azad Laçında bayrağımızı Müzəffər Ali Baş Komandanımızın qaldırması sözün əsl mənasında gücümüzü və qətiyyətimizi göstərdi! İstər xarici düşmənlərimizə, istərsə də erməni diasporunun sifarişlərini yerinə yetirən sapı özümüzdən olan baltalara ən gözəl cavab oldu. Unutmamalıyıq ki, bu gün böyük savaş həm də informasiya sahəsində gedir və hər bir vətəndaşımız bu savaşda Vətənimizi, xalqımızı layiqincə təmsil etməli və dövlətimizin əsgəri olmalıdır”.

Ramiz Alıyev vurğulayıb ki, Prezident İlham Əliyevin Laçına səfəri, inşa edilən infrastruktur layihələrinin tikintisi ilə maraqlanması və yeni layihələrin inşa edilməsi ilə bağlı vermiş olduğu tapşırıqlar bir daha göstərir ki, həmin torpaqların hər qarışı bizim üçün doğma və əzizdir: “30 il ərzində torpaqlarımızı işğal edən erməni hərbi birləşmələri o torpaqları ancaq talamaq və yandırmaqla məşğul olub. Təəssüflər olsun ki, bu gün bizə təzyiq etmək xəyalına düşən böyük dövlətlər talançılıqla məşğul olan, dini, mədəni abidələrimizi talan edən barbar bir dövlətə etiraz edə bilmirdilər. Ancaq bu gün Azərbaycan öz ərazilərini terrorçulardan təmizləyib, təhlükəsizliyini qorumağa çalışanda bəzi ölkələr buna kəskin etirazını bildirməyə cəhd edir. Onda məntiqlə düşünəndə belə çıxır ki, həmin ölkələr də bu terrorist qrupları və vandalizmi dəstəkləyən dövlətlərdir”.

Politoloq qeyd edib ki, Azərbaycan yenə də Ermənistanı sülhə çağırır və sülh haqqında sazişin konkret mətni üzərində işlənməsini təklif edir: “Prezident İlham Əliyev Laçın şəhərində etdiyi çıxışda öz mövqeyini bildirib. Bu aspektdə ikinci məsələ sülh sazişindən irəli gələn delimitasiya prosesidir. İlk olaraq ölkələr bir-birinin ərazi bütövlüyünü və suverenliyini tanımalı, onun əsasında delimitasiya prosesi baş verməlidir. Üçüncüsü, Prezident İlham Əliyev Azərbaycana qarşı olan bütün ittihamları rədd edib. Çünki Ermənistanın iddia etdiyi Azərbaycanla sərhəd xəttində ötən 30 ildə heç bir inşa işləri aparılmayıb, kommunikasiyalar, mühəndis işləri görülməyib. Həmin yerlərdə sərhəd nişanları yoxdur. Deməli, bu da işğal faktıdır. İşğal faktını Azərbaycan sülh yox, güc yolu ilə aradan götürüb. Sərhədimizin delimitasiyası keçirilmədən sərhədin haradan keçməsinin aydın deyil və nəticə etibarilə Azərbaycana qarşı ittihamların da hüquqi əsası yoxdur. Bunlar Prezident İlham Əliyev tərəfindən verilən 3 əsas mesajdır. Ermənistanı danışıqlara dəvət edirik, diplomatik səylər davam etdirilməlidir. Eyni zamanda Azərbaycan hər zaman öz ərazi bütövlüyünə təhdid yaranarsa, buna layiqli cavab verməyə hazırdır”.