Bu gün dünyanı dəyişdirən 11 sentyabr terror aktlarından 23 il keçir.

Sabahinfo.az xatırladır ki, 2001-ci ildə baş verən bu faciə dünya tarixində ən böyük terror hadisələrindən biri kimi yadda qalıb, onun təsirləri hələ də hiss edilməkdədir.

ABŞ-nin Nyu-York ştatındakı Dünya Ticarət Mərkəzi və Vaşinqtonda yerləşən Pentaqonun hədəf alındığı hücumlar nəticəsində 2,977 nəfər həyatını itirib, onlarla insan itkin düşüb və 6,000-dən çox insan yaralanıb.

Bu hücumlar təkcə ABŞ-də deyil, bütün dünyada terrorizmlə mübarizənin sürətlənməsinə və təhlükəsizlik sahəsində ciddi dəyişikliklərə səbəb olub. Bu hadisə beynəlxalq münasibətlərin istiqamətini dəyişərək terrorizmə qarşı qlobal mübarizəyə start verdi və sonrakı illərdə bir çox ölkələr yeni terror hücumlarına qarşı güclü tədbirlər gördü.

11 sentyabr hadisələrinin təsirləri bu gün də hiss olunur. Dünya iqtisadiyyatına vurulan zərər, miqrasiya axınlarının artması, eləcə də qlobal siyasətin dəyişməsi nəticəsində beynəlxalq arenada yeni təhlükəsizlik sistemləri formalaşdırılıb. ABŞ-nin Əfqanıstanda və İraqda həyata keçirdiyi hərbi müdaxilələr də məhz bu hadisələrin nəticəsi kimi qiymətləndirilir.

Bu gün ABŞ xalqı 11 sentyabr qurbanlarını yad edir, onların xatirəsi anılır.