Azərbaycanda məmur-vətəndaş arasında təması minimuma endirmək məqsədilə gömrük sahəsində nəzarətdən xidmət yönümlü gömrüyə keçmək, o cümlədən elektron gömrük sisteminin yaradılması vacibdir.

"APA-Economics" xəbər verir ki, bunu Dövlət Gömrük Komitəsinin Fəaliyyətin Qiymətləndirilməsi və İnkişaf Proqramları Baş İdarəsinin rəisi İqbal Babayev bu gün Bakı Ekspo Mərkəzində keçirilən "Daşınmaz əmlak, özəlləşdirmə və investisiya" mövzusunda konfransda  çıxışı zamanı deyib.

Onun sözlərinə görə, Azərbaycanın gömrük sahəsində son illərdə bir çox nailiyyətlər əldə edilib. "Nailiyyətlərimizdən biri də budur ki, Azərbaycanın bütün sərhəd qapıları böyük skanerlərlə təchiz olunub.  Hal-hazırda Yalama dəmiryolu üzrə tam skanerləşmə başa çatdırılaraq işə salınıb. Böyük Kəsik dəmiryolu üzrə isə proses test mərhələsindədir. Yaxın bir neçə ay ərzində də burada skanerləşmə işə düşəcək. Əgər yerlərdə gömrükçülər hər hansı səhvə yol verərsə, skanerlər vasitəsilə əldə olunan məlumatın köməyi ilə müdaxilə olunur. Bunun sayəsində biz bu yaxınlarda 1200 kq heroinin keçirilməsinin qarşısını almışıq", - deyə İ. Babayev qeyd edib.

İ. Babayev əlavə edib ki, ölkə üzrə 12 sərhəd qapısı skanerləşdirilib və bu proses yalnız Azərbaycanda həyata keçirilib.