Yasamal rayonunda sakinlər üçün aprel ayı üzrə səyyar qəbul keçirilib. Yasamal Rayon İcra Hakimiyyətinin başçısı Elşad Həsənovun sakinlərlə görüşü rayondakı 225 nömrəli tam orta məktəbin akt zalında baş tutub.

Tədbirdə, həmçinin Yasamal RİH-in vəzifəli şəxsləri, Bələdiyyə və MKTB-in rəhbər heyəti, xidmət sahələrinin nümayəndələri də iştirak ediblər.

İcra Hakimiyyətinin başçısı Elşad Həsənov sakinlərdən təklif və müraciətləri bərədə ətraflı məlumat verməyi xahiş edib.

Yasamal sakinləri rayon üzrə qeydiyyat, iş yerləri, dava-dərman alınmasına dəstək, mənzil növbəsi, köçürülməyə görə kompensasiya, avtoparkinq, bina zirzəmilərinin özəlləşdirilməsi və müxtəlif sosial məsələləri əhatə edən digər mövzular qaldırıblar.

Elşad Həsənov qəbul zamanı müraciət edən rayon sakinlərini dinləyərək onların problemlərinin aradan qaldırılmasına dair RİH əməkdaşlarına və xidmət rəhbərlərinə bir sıra konkret göstərişlər verib. Bəzi məsələlər yerindəcə həll edilib, icrası vaxt tələb edən müraciətlər isə araşdırılaraq həll edilməsi üçün icraata götürülüb.