Azərbaycanın hər qarışı, hər daşı, hər dağ-meşəsi xalqımız üçün müqəddəsdir. Bu torpaqlar təkcə coğrafi məkan deyil, həm də azadlıq və qəhrəmanlıq rəmzidir. 25 oktyabr isə Azərbaycan tarixində xüsusi yer tutan bir gündür – bu tarix Qubadlı şəhərinin işğaldan azad olunduğu, Azərbaycan əsgərinin yenilməz iradəsinin bir daha sübut edildiyi gündür.

1993-cü ilin avqust ayında Ermənistan silahlı qüvvələri tərəfindən işğal olunan Qubadlı, 27 il müddətində düşmən tapdağı altında qaldı. Bu illər ərzində şəhər və kəndlər dağıdıldı, tarixi abidələr məhv edildi, minlərlə sakin doğma yurdlarından didərgin düşdü. Lakin xalqımız heç zaman bu ədalətsizliyi unutmur, doğma torpaqlara qayıdış gününü səbrlə gözləyirdi.

2020-ci il 27 sentyabrda başlayan Vətən müharibəsi xalqımızın bu arzularını reallığa çevirdi. Azərbaycan Ordusu Müzəffər Ali Baş Komandan, Prezident İlham Əliyevin rəhbərliyi ilə 44 gün ərzində işğal altında olan torpaqlarımızı azad etdi. 25 oktyabr 2020-ci ildə Qubadlının azad edilməsi bu tarixi Zəfərin mühüm mərhələlərindən biri oldu. Bu gün həm Qubadlı əhalisinin, həm də bütün Azərbaycanın qürurla xatırladığı bir gündür. Prezident İlham Əliyev həmin vaxt etdiyi müraciətində demişdi: “Qubadlı bizimdir! Qubadlı azaddır! Qarabağ Azərbaycandır!”

Zəfərdən sonra ölkəmizdə bərpa və quruculuq dövrü başlandı. Azad olunan Qubadlıda da genişmiqyaslı yenidənqurma işləri həyata keçirilir. Yeni infrastruktur, yollar, körpülər, məktəblər, xəstəxanalar və yaşayış kompleksləri inşa olunur. Şəhərin Baş planı əsasında müasir urbanist tələblərə cavab verən, “ağıllı şəhər” konsepsiyası üzərində qurulan yeni Qubadlı salınır.

Prezident İlham Əliyev və Birinci vitse-prezident Mehriban Əliyeva Qubadlıya dəfələrlə səfər edərək görülən işlərlə yerində tanış olublar. Bu səfərlər dövlətin azad olunmuş torpaqlara verdiyi yüksək önəmin, Qubadlının da Qarabağın digər bölgələri kimi dirçələcəyinin əyani göstəricisidir. Artıq “Böyük Qayıdış” proqramı çərçivəsində Qubadlıya ilk sakinlərin köçürülməsi prosesi də başlanıb.

Qubadlı torpağı Azərbaycan tarixi boyu igid oğullar, qəhrəman döyüşçülər yetişdirib. 44 günlük Vətən müharibəsində Qubadlıdan olan bir çox gənclər qəhrəmanlıq göstərərək şəhidlik zirvəsinə ucaldı. Onların adları bu torpağın hər qarışında əbədi yaşayır. Qubadlının azadlığı uğrunda canını fəda edən şəhidlərin xatirəsi xalqımızın qəlbində daim ehtiramla anılır.

Bu gün Qubadlı işğal illərindəki yaralarını sağaldaraq yenidən doğulur. Dövlət tərəfindən həyata keçirilən məqsədyönlü siyasət, xalqın sarsılmaz birliyi və Prezident İlham Əliyevin qətiyyəti nəticəsində Qubadlı qısa zamanda Cənubi Qafqazın ən inkişaf etmiş bölgələrindən birinə çevriləcək. Qubadlının azadlığı təkcə bir şəhərin deyil, bütün Azərbaycanın milli qürurunun təntənəsidir.

25 oktyabr – Qubadlı şəhər günü təkcə bir tarix deyil, həm də Azərbaycan xalqının iradəsinin, vətən sevgisinin və qəhrəmanlıq ruhunun təcəssümüdür. Bu gün Qubadlıya qayıdış həm Zəfərimizin, həm də yenilməz milli ruhumuzun rəmzidir.

Əminə Ağazadə

Milli Məclisin deputatı