2018-ci il 11 apreldə Azərbaycanda keçirilən Prezident seçkiləri xalqımızın öz istəyini müstəqil şəkildə ifadə etdiyi, mahiyyət etibarilə mütəşəkkil və sivil qaydalara əsaslanan seçki kimi yadda qaldı. Və xalqımız özünün layiqli namizədinə – İlham Əliyev cənablarına səs verməklə müdrikliyini bir daha nümayiş etdirdi. Bu, həm də Azərbaycan xalqının Prezident İlham Əliyevin yorulmaz fəaliyyətinə, haqq-ədalətə, qurulmuş möhkəm dövlətçiliyə, sülh, sabitlik istəyini nümayiş etdirən və parlaq gələcəyə verilən tarixi dəyərdir.
Qeyd edək ki, Prezident İlham Əliyev Yeni Azərbaycan Partiyasının namizədi olmasına baxmayaraq, cənab Prezidenti körpədən ahıl yaşlı insanlara qədər hər kəsin alternativsiz Lideridir. Bu, dövlət başçısının öz taleyini xalqın taleyinə bağlamasından xəbər verir. Bu, həm partiyamızın, həm də bütöv Azərbaycan xalqının güclü dövlətçilik uğrunda ümummilli qələbəsi deməkdir. 11 aprel 2018-ci il seçkisi həm də xalqın öz Prezidentinə və iqtidarına inamını, güvənini bir daha rəsmi şəkildə müəyyənləşdirdiyi tarixdir. Bu tarixdə xalq müdrik bir seçim edərək cənab İlham Əliyevi növbəti dəfə Prezident seçdilər.
2018-ci il 11 aprel tarixli andiçmə mərasimindəki çıxışı zamanı Prezident İlham Əliyevin “Biz gələcəyə baxmalıyıq və baxırıq. Növbəti illərdə görüləcək işlər haqqında bizim çox aydın təsəvvürümüz, planlarımız, proqramlarımız var. Ona görə mən əminəm ki, bütün Azərbaycan xalqı və biz hamımız gələcəyə çox böyük nikbinliklə baxırıq. Hamımızın amalı ondan ibarətdir ki, ölkəmiz daha da güclənsin, daha da qüdrətli dövlətə çevrilsin, Azərbaycan vətəndaşları daha da yaxşı yaşasınlar” fikrini ifadə etməsi onu deməyə əsas verir ki, bəli, Prezident İlham Əliyev həyatını dövlətə, xalqa xidmətə həsr edib və əvvəlki seçkilərdə olduğu kimi, şəffaf, azad, demokratik şəraitdə keçirilən növbədənkənar 2018-ci il 11 aprel prezident seçkiləri zamanı Yeni Azərbaycan Partiyasının namizədi, partiyanın Sədri cənab İlham Əliyev Azərbaycan seçicilərinin mütləq əksəriyyətinin, 86,02 faizinin səsini qazanaraq Azərbaycan Respublikasının Prezidenti seçilmişdir.
Azərbaycan xalqı Prezident İlham Əliyevi seçməklə görülən işlərə yüksək qiymət vermiş, görülən işlərə, inkişafa, tərəqqiyə, təhlükəsizliyə, gələcəyə səs vermişdir. Bəli, 2003-2018-ci illər tariximizə möhtəşəm iqtisadi yüksəliş dövrü kimi daxil olan bu dövrdə ümumi daxili məhsul 3,2 dəfə, büdcə gəlirləri 13,5 dəfə artıb. Ölkənin strateji valyuta ehtiyatları 26,6 dəfə artıb, maliyyə imkanlarımız əsaslı şəkildə yaxşılaşıb. Xarici ticarət dövriyyəsi 4,6 dəfə, ixracın həcmi altı dəfə artıb. Regionlarda ümumi məhsul buraxılışının artımı 3,6 dəfəyə bərabər olub, işsizliyin səviyyəsi 5 faizə, yoxsulluğun səviyyəsi 5,4 faizə enmişdir. Azərbaycan qlobal rəqabətlilik indeksində dünyadakı mövqeyini xeyli gücləndirmişdir. Davos Dünya İqtisadi Forumunun “2017-2018 Qlobal Rəqabətlilik Hesabatı”nda Azərbaycan 35-ci pillədə qərarlaşıb və MDB məkanında liderliyini qoruyub saxlayıb. Azərbaycan dünyada ən çox islahat aparan 10 ölkədən biri kimi tanınıb.
«Azərbaycan tarixdə heç vaxt indiki qədər güclü, indiki qüdrətli dövlət olmamışdır. Bunu biz yaratmışıq. Azərbaycan xalqının iradəsi, Azərbaycan dövlətinin siyasəti bu gün ölkəmizin inkişafı üçün əsas amildir. Azərbaycan bundan sonrakı dövrdə də uğurla inkişaf edəcək. Bizim bütün planlarımız həyata keçirilir. Verdiyimiz bütün vədlər yerinə yetirilir" - deyən dövlət başçımızın bu sözləri, əslində, Prezident İlham Əliyevin 18 illik fəaliyyətinin ümumi icmalı, qısa hesabatıdır.
Və xalq da 2018-ci il 11 apreldə keçirilən prezident seçkilərində düzgün yolla irəliləyən liderinə, istiqlalımızın bayraqdarına, tarixin ən möhtəşəm Azərbaycanını yaradan Prezident İlham Əliyev cənablarına qarşıdakı 7 il üçün xeyir-duasını, dəstəyini verdi... Və Prezident İlham Əliyev xalqın xilaskarı olmağı bacardı.
Ən əsası isə, Prezident İlham Əliyev ötən 18 il ərzində millətimiz üçün ən ağrılı bəla olan Ermənistan-Azərbaycan, Dağlıq Qarabağ münaqişəsi ilə bağlı prinsipial mövqeyini hər zaman belə ifadə edib: "Azərbaycan heç vaxt öz ərazi bütövlüyünün pozulması ilə barışmayacaq, torpaqlarında ikinci erməni dövlətinin yaranmasına yol verməyəcəkdir. Ölkəmizin ərazi bütövlüyü tam bərpa edilməli, azərbaycanlılar əzəli yurdlarına qayıtmalıdırlar. "Qarabağ Azərbaycandır və nida". Nəticədə, Azərbaycan xalqı hal-hazırda tarixinin ən əlamətdar günlərini yaşayır. Xalqımızın müdafiəsində dayanan Prezident, Ali Baş Komandan İlham Əliyev 2020-ci ilin oktyabrın 4-ü xalqa müraciətində bu məsələlərə toxunaraq qeyd edirdi: "Ermənistanın baş naziri gedib Şuşada, Cıdır düzündə rəqs edir, hesab edir ki, biz bununla barışacağıq?! Səhv edir! Heç vaxt biz bununla barışmayacağıq. Qondarma "Dağlıq Qarabağ respublikası"nın parlamentinin Şuşaya köçürülməsi nə deməkdir?! Yenə də Azərbaycan xalqını təhqir etmək cəhdidir".
Bəli, budur xalqının Prezidenti olmaq! Budur, Lider, Qalib və bu illər ərzində verdiyi sözə əməl edən Prezident! Prezident İlham Əliyev Ermənistana və onun havadarlarına dəfələrlə etdiyi xəbərdarlıqlarının boş söz olmadığını 44 günlük müharibə ərzində sübut etdi. Nəticədə, noyabrın 10-da Nikol Paşinyan 2016-cı ilin aprelindəki Serj Sarkisyanın hərəkətini təkrarlayaraq Azərbaycan dövləti, Azərbaycan Ali Baş Komandanı, Azərbaycan xalqı qarşısında diz çökdü! Bir daha bütün dünya gördü ki, Azərbaycan Prezidenti İlham Əliyev xalqın xilaskarı olmağı bacardı.
Bir sözlə, son 200 ildə torpaqları əlindən alınan, parçalanan Azərbaycan dövlət olaraq Prezident İlham Əliyevin rəhbərliyi altında ilk dəfədir ki, torpaqlarını 2020-ci il sentyabrın 27-də Ermənistan silahlı qüvvələrinin növbəti hərbi təxribatına cavab olaraq “İrəli!” əmri əsasında bütün qüvvə və bacarığını səfərbər edən Azərbaycan Ordusunun gücü, qüdrəti sayəsində xalqımızın milli qüruru özünə qayıtdı. 44 günlük Vətən müharibəsi zamanı bütün dünya bir daha şahidi oldu ki, Azərbaycan həqiqətən də güclü dövlətdir, Müzəffər Ali Baş Komandan İlham Əliyevin uzun illər ərzində həyata keçirdiyi ordu quruculuğu nəticəsində dünyanın ən güclü 50 ordusundan birinə çevrilən Azərbaycan Ordusu bu gün döyüş meydanında öz sözünü dedi və işğal altında olan torpaqlarımızı düşmən tapdağından azad etdi. Zəfər tarixini yazan cənab İlham Əliyev Azərbaycanın ərazi bütövlüyünü bərpa edən müzəffər Ali Baş Komandan kimi adını əbədi olaraq tarixə yazdı və bütün xalq şahidi olur ki, cənab Prezidentin verdiyi bütün vədlər gerçəkliyə çevrilir. Çünki Azərbaycan xalqı öz Prezidentinə inanır, güvənir və əmindir ki, qısa zaman çərçivəsində işğaldan azad edilmiş ərazilərimiz tezliklə yenidən qurulacaq, yenidən canlanacaq, dirçələcək. Azərbaycanın ayrılmaz hissəsi və ən gözəl güşələrindən biri olan Qarabağ cənab Prezidentin dediyi kimi, əsl cənnət məkanına çevriləcək. Böyük Qayıdış başlayacaq. Azərbaycan dünyanın ən abad, gözəl, inkişaf etmiş dövlətləri sırasında olacaqdır.
ELMAR ƏHMƏDOV,
YAP Səlyan rayon təşkilatının sədri