Prezident cənab İlham Əliyevin mayın 22-də Litvaya rəsmi səfəri öz zəngin proqramı ilə yadda qaldı. Azərbaycan və Litva strateji tərfdaş ölkələrdir. İki ölkə arasında müxtəlif sahələri əhatə edən çox yüksək səviyyəli əməkdaşlıq mövcuddur. Səfər zamanı imzalanmış əməkdaşlıq sənədləri də həmçinin ölkələrimiz arasında olan yüksək səviyyəli dialoqdan xəbər verir.
Prezident cənab İlham Əliyev Litvada rəsmi səfəri zamanı mətbuata verdiyi bəyanatında öncə Azərbaycan həqiqətlərinə diqqət çəkdi. Ölkə başçısı Azərbaycanın uzun illər Ermənistanın işğalı ilə üzləşdiyini xatırladaraq işğalın acı fəsadlarından danışdı. Bir milyon azərbaycanlı bu işğal nəticəsində öz doğma torpaqlarından didərgin düşmüş, ərazilərimizin təxminən 20 faizi işğal olunmuşdu. İşğal edilmiş ərazilərdə bütün infrastruktur, binalar, o cümlədən tarixi abidələr işğalçılar tərəfindən dağıdılıb. Bəyanatında sülh danışıqlarına toxunan Prezident cənab İlham Əliyev bildirdi ki, sülh danışıqlarının aparılması nəticə etibarilə Qafqaza uzunmüddətli sülh gətirəcək. Sülh anlaşmasının imzalanması qaçılmazdır və Azərbaycan öz tərəfindən bu məqsədə çatmaq üçün konstruktiv səylər göstərir.
Mətbuata bəyanatında ölkə başçısı Azərbaycan və Litva arasında gələcək əməkdaşlıq istiqamətindən bəhs edrkən qeyd etdi ki, qitələri birləşdirən Avrasiya qitəsində daha da rahat nəqliyyat-kommunikasiya imkanlarını yaratmaq üçün ölkələrimizin payına böyük vəzifələr düşür. Dünyada hökm sürən yeni geosiyasi reallıq da bunu diktə edir.
Litvaya rəsmi səfəri zamanı Prezident cənab İlham Əliyev Vilnüs şəhərində keçirilmiş Azərbaycan-Litva biznes forumunda çıxışında isə ölkələrimizin iqtisadi sahədəki yüksək səviyyəli əməkdaşlığından, eləcə də gələcək planlardan geniş bəhs etdi. Ölkə başçısı qeyd etdi ki, Azərbaycan və Litva arasında əməkdaşlıq potensialı kifayət qədər böyükdür. Bura ənənəvi enerji layihələri o cümlədən, bərpaolunan enerji sahəsi daxildir. Məlum olduğu kimi ölkəmizin Xəzər dənizində, Litvanın isə Baltik dənizində çox böyük külək enerjisi potensialı var. Prezident cənab İlham Əliyev vurğuladı ki, Azərbaycanda enerji təhlükəsizliyi mövcuddur. Lakin, Azərbaycan ixrac məqsədləri üçün daha çox təbii qaza qənaət etmək və elektrik enerjisinin istehsalı üçün təbiətin günəş və külək enerjilərindən istifadə etmək niyyətindədir.
Ölkə başçısı biznes forumunda onu da xatırlatdı ki, ötən ilin iyulunda Avropa Komissiyası və Azərbaycan Enerji sahəsində Strateji Tərəfdaşlıqla bağlı Anlaşma Memorandumu imzalayıblar. Ölkəmiz Memoranduma əsasən 2027-ci ilə qədər Avropaya təbii qaz təchizatını iki dəfə artırmağı planlaşdırır. 2021-ci ildə Azərbaycanın Avropaya təbii qaz təchizatı 8 milyard kubmetr olmuş, bu il isə 12 milyard kubmetr olacaq və 2027-ci ilə qədər 20 milyard kubmetrə çatdırılacaq. Avropanın etibarlı təchizatçısı kimi Azərbaycan bu gün nefti, təbii qazı və elektrik enerjisini ixrac edir. Həmçinin ölkəmiz hidrogeni, o cümlədən yaşıl hidrogeni də ixrac etməyi planlaşdırır. Enerji layihələrindən bəhs edərkən ölkə başçısı onu da qeyd etdi ki, Avropanın enerji xəritəsi əsasən, Azərbaycanın təşəbbüsləri sayəsində kəskin şəkildə dəyişib.
Əlişah Rəcəbov,
YAP Ağdaş rayon təşkilatının sədri
