“Bu gün Avropa İttifaqı Şurasının Prezidenti Şarl Mişelin dəstəyi və dəvəti ilə Brüsseldə Azərbaycan Respublikasının Prezidenti İlham Əliyevlə Ermənistanın Baş Naziri Nikol Paşinyan arasında növbəti görüş oldu. Həm Azərbaycan xalqı, həm də dünya siyasətçiləri bir daha İlham Əliyev diplomatiyasının gücünə və onun necə böyük siyasətci olmasına şahidlik etdi. Brüssel görüşü Azərbaycanın növbəti diplomatik qələbəsidir.

Bunu  APA-ya açıqlamasında politoloq Ramiz Alıyev bildirib.

Politoloq deyib ki, artıq il ərzində ikinci dəfədir ki, Avropa İttifaqı Şurasının Prezidenti Şarl Mişelin təşəbbüsü ilə hər iki ölkə liderinin görüşü baş tutur: “Hər iki görüş olduqca səmərəli və Azərbaycan diplomatiyasının qələbəsi ilə başa çatıb. Bunun da səbəbi ağıllı siyasət, hərbi arenada qazanılan uğuru diplomatiya sahəsində də təkrarlamaq və ən əsası da “dəmir yumuruq” amilidir. Bugünkü görüşdə də Azərbaycan öz istəyinə nail olub. Biz bunu həm Şarl Mişelin, həm də Prezident İlham Əliyevin bəyanatından görə bilərik. Artıq hansısa bir statusdan söz gedə bilməz, Qarabağ Azərbaycanın daxili işidir və ona kənardan kimsə müdaxilə edə bilməz, edən olsa da “dəmir yumuruq” yerindədir. Bunu hər kəs bir daha 3 avqust tarixində “Qisas” əməliyyatında gördü. Artıq Ermənistan tərəfi də anlamalı idi ki, geriyə yol yoxdur. Onlar üçün də ən uyğun variant odur ki, Azərbaycanın təqdim etdiyi və Avropa İttifaqı Şurasının Prezidenti Şarl Mişelin də bəyəndiyi 5 maddədən ibarət təkliflər paketini qəbul etsinlər. Ermənistan sərhədlərin delimitasiya və demarkasiyası proseslərinə müsbət yanaşmalı, nəqliyyat və kommunikasiyaların açılması ilə bağlı 2020-ci il 10 noyabr bəyanatında üzərinə götürmüş olduğu öhdəlikləri yerinə yetirməlidir. Artıq qəbul edilmiş yeni sənəddə nə “Qarabağ münaqişəsi” sözü var, nə də ATƏT-in Minsk qrupu qeyd olunur. Prezident İlham Əliyevin də dediyi kimi, artıq münaqişə ilə bağlı keçmişə aid heç nə yoxdur. Ancaq irəli baxmaq və mövcud vəziyyətlə barışmaq lazımdır. Yoxsa Ermənistan üçün heç də yaxşı olmayacaq”.

Ramiz Alıyev qeyd edib ki, Azərbaycan diktə edən tərəfdir, qalib ölkədir, sülh müqaviləsi də Bakının irəli sürdüyü və İrəvanın qəbul etdiyi məlum beş prinsip əsasında qurulacaq: “Bu görüşdə əldə olunmuş razılığa əsasən, bir ay müddətində Xarici İşlər Nazirliyi xətti ilə sülh sazişinin mətni üzərində işə başlamaq üçün qruplar yaratmaq barədə razılığın əldə olunması onu göstərir ki, sülhə gedən yol açılıb, Ermənistan mövcud vəziyyətlə barışaraq, həm üzərinə götürmüş olduğu öhdəlikləri yerinə yetirmək, həmdə öz ölkəsini səfalətdən qurtarmaq niyyətindədir. Ermənistan tərəfi tez bir zamanda sülh sazişinin imzalanmasından başqa ikinci bir yolun olmadığını anladı. Çünki sülh müqaviləsi üçün hər gecikən gün Ermənistanın əleyhinə işləyir. Bütün bunların baş verməsinin əsas səbəbi qeyd etdiyimiz kimi düşünülmüş ağıllı siyasət və dəmir yumruqdur. Eyni zamanda bu razılaşmalarda Şarl Mişelin xüsusi və şəxsi rolunu da qeyd etmək vacibdir. Avropa İttifaqının Prezidentinin sülh müqaviləsi danışıqlarına və dövlətlərarası münasibətlərin normallaşmasına kömək etməsi təqdir olunmalıdır. Bu gün Ermənistan tərəfi artıq anladı ki, sülh müqaviləsi və üzərinə götürmüş olduğu öhdəliklər qaçılmazdır”.