İlham Zəkiyev: - Rio-2016-ya medal ümidi ilə yollanacağıq

"Rio-2016-da iştirak edən idmançılarımızın çıxışlarından xəbərdaram. Artıq 3 medalımız var. Ancaq qızıl medal gözləyirik”.

sabahinfo.az  Report-a istinadən xəbər verir ki, bunu Avropa çempionu, "Bakı 2015” I Avropa Oyunlarının qalibi, Paralimpiya Oyunlarının qızıl medalçısıİlham Zəkiyev deyib.

İ.Zəkiyev 66 kq çəkidə bu gün döşək üzərinə çıxacaq yunan-Roma güləşçisi Rəsul Çunayevdən medal gözlədiyini bildirib.

"Rəsul favorit idmançılarımızdandır və ondan qızıl medal gözləyirik. Boksçularımızdan yaxşı çıxış edənləri var. Kamran Şahsuvarlı hamımızı yaxşı mənada təəccübləndirdi. Ona halal olsun, yaxşı döyüşdü. Lorenzo Sotomayordan da medal gözləyirəm. Ötən olimpiadada da güləşçilərimiz bizi sevindirdi. Sərbəst güləşdə medal ümidlərimiz var. Düşünürəm ki, hələ pis deyil”, - deyə İ.Zəkiyev bildirib.

Paralimpiyaçı Rio-de-Janeyroya medal ümidi ilə yollanacaqlarını da söyləyib.

"Sentyabrın 2-də yola düşürük. Yarışda 6 oğlan və bir qız cüdoçu mübarizə aparacaq. Medal ümidlərimiz var. Göygöldə təlim-məşq toplanışından qayıtmışıq. Ramin İbrahimov, Bayram Musatafayev və digər idmançılarımızdan medal gözləyirəm”, - deyə İ.Zəkiyev bildirib.

Qeyd edək ki, paralimpiya yarışları 7-18 sentyabrda olacaq.