“Azərbaycan Almaniyanın regionda ən vacib siyasi-iqtisadi tərəfdaşlarından biridir. Berlin ölkəmizin Cənubi Qafqazda lider mövqeyini qəbul edir və dəstəkləyir. Almaniya Azərbaycanın beynəlxalq səviyyədə tanınmış sərhədləri daxilində suverenliyini dəstəklədiyini dəfələrlə bəyan edib. Almaniya Prezidenti Frank-Valter Ştaynmayerin Azərbaycana səfəri zamanı mətbuata birgə bəyanatında “Biz Qarabağın Azərbaycan ərazisi olduğunu bilirik, tanıyırıq” deməsi Berlinin ərazi bütövlüyümüzə ən yüksək səviyyədə hörmətinin əyani sübutudur”.
Sabahinfo.az xəbər verir ki, bu fikirləri Milli Məclisin deputatı Tahir Mirkişili bildirib.
Onun sözlərinə görə, cənab Ştaynmayerin Azərbaycana ilk səfəri ikitərəfli münasibətlərimizin tarixində xüsusi əhəmiyyət daşıyır: “İki ölkə arasında etibarlı tərəfdaşlıq hərtərəfli və yüksələn xətlə inkişaf edir. Prezidentlərin səfər çərçivəsində ikitərəfli və nümayəndə heyəti ilə birlikdə apardıqları müzakirələr olduqca əhəmiyyətlidir. Mətbuata verilən birgə bəyanatda Prezident İlham Əliyev Almaniya prezidentinin Azərbaycana səfərinin əhəmiyyətini yüksək qiymətləndirdi və bunun əlaqələrimizə müsbət təkan verəcəyini vurğuladı. Bu ilin yanvar-fevral aylarında Azərbaycandan Almaniyaya ixrac edilən xam neftin həcminin artması nəticəsində ticarət dövriyyəsinin təxminən üç dəfə artması geniş iqtisadi əməkdaşlıq potensialının mövcudluğundan xəbər verir. Əsas hədəflərdən biri gələcəkdə ölkələr arasında ticarət dövriyyəsinin şaxələndirilməsidir. Bərpaolunan enerji sahəsində Almaniya şirkətlərinin təcrübəsinin ölkəmizdə tətbiqi bu sahənin inkişafına təkan verəcək. Azərbaycan xarici investorların sərmayəsi hesabına 2030-cu ilə qədər bərpaolunan enerji növlərinin istehsal gücünü 6 giqavata çatdırmaq niyyətindədir. Azərbaycan bərpaolunan enerji mənbələrinə böyük investisiya yatırır. Bu sahədə böyük təcrübəsi olan Almaniya öz uğurlarını bizimlə bölüşə bilər. Avropanın enerji təhlükəsizliyində mühüm rol oynayan ölkəmiz gələcəkdə “yaşıl enerji” ixracatçısı kimi bu rolunu daha da gücləndirəcək. Onu da qeyd edək ki, hazırda Azərbaycanda 100-ə yaxın alman müəssisəsi fəaliyyət göstərir. “Siemens”, “Ferrosstal”, “InterSelect”, “Mercedes-Benz” kimi iri şirkətlərə fəaliyyət üçün ölkəmizdə hər cür şərait yaradılıb. Onlar buradakı mühitdən razılıqlarını ifadə ediblər. Hazırda Almaniya ilə Azərbaycan arasında illik ticarət dövriyyəsi təxminən 400 milyon avrodan çoxdur. Avropanın ən güclü sənaye dövlətlərindən biri olan Almaniya Bakı-Tbilisi-Qars dəmir yolu, Zəngəzur dəhlizi və Orta Dəhliz kimi iri nəqliyyat layihələrinə böyük maraq göstərir. Mərkəzi Asiya və Çin bazarlarına çıxmaq istəyən Berlin Azərbaycandan keçən dəhlizlərə üstünlük verir”.
T.Mirkişili əlavə edib ki, Prezident İlham Əliyev Almaniyanın ötən il Bakıda keçirilən COP29 beynəlxalq iqlim konfransında iştirakını yüksək qiymətləndirib: “COP29-da 197 ölkəni təmsil edən 77 mindən çox iştirakçı qeydiyyatdan keçmişdi və bu amil onun qlobal əhəmiyyətli bir konfrans olduğunu, uğurlu nəticələrlə yadda qaldığını bir daha təsdqiləmiş olur. Ermənistan isə bu beynəlxalq tədbirə qatılmadı. Azərbaycanla Ermənistan arasında normallaşma prosesinin uğurla getdiyi bir zamanda İrəvanın bu beynəlxalq konfransa qatılmamasının başadüşülən olmadığı Prezident İlham Əliyev tərəfindən də vurğulandı. Azərbaycanın 30 il ərzində Ermənistanın işğalından əziyyət çəkdiyi, xalqımızın etnik təmizləməyə məruz qaldığı, bir milyon azərbaycanlının məhz erməni aqressiyasına görə ev-eşiyindən didərgin düşdüyü ölkə başçısı tərəfindən qeyd olundu. Avropa İttifaqının əsas dövlətlərindən olan Almaniya Cənubi Qafqazda gedən prosesləri yaxından izləyir. Berlin Azərbaycan və Ermənistan arasında münasibətlərin normallaşmasının, sülhün tərəfdarıdır. Bunu Frank-Valter Ştaynmayer Bakıda açıq bəyan etdi. Alman şirkətləri Qarabağ və Şərqi Zəngəzurda aparılan bərpa, yenidənqurma işlərində iştiraka böyük maraq göstərirlər.
Onu da qeyd edək ki, Almaniya ilk gündən Qarabağ münaqişəsinin həlli istiqamətində konstruktiv mövqe sərgiləyib. Bu mövqe hazırda da davam edir. Bu gün Almaniya-Azərbaycan əlaqələri daha çox qarşılıqlı iqtisadi maraqlar üzərində qurulub. Berlində yaxşı başa düşürlər ki, İran və Rusiya ilə həmsərhəd olan Azərbaycanla əməkdaşlıq Avropa üçün hava-su kimi lazımdır. Azərbaycanın bir müsəlman ölkəsi kimi demokratik dəyərlərə üstünlük verməsi də Almaniyanın diqqətindən yayınmır. Bütün hallarda Almaniya Prezidentinin Bakıya səfəri iki ölkənin əlaqələrində yeni səhifə açacaq”.
