Milli Məclisin deputatı Cavid Osmanovun SABAHİNFO.AZ saytına müsahibəsi

-Cavid müəllim  Şanlı Qələbə hissi ilə yaşayırıq. Qalib xalqın millət vəkili kimi əldə olunan Zəfər barəsində sizin fikirləriniz maraqlıdır.

-Əlbətdə qalib xalqın vətəndaşı kimi hər birimiz qürur hissi keçiririk. 30 ildən artıqdır ki, biz bu qələbəni gözləyirdik. Biz bu qələbəni istəyirdik. Bu istəyimizin reallaşması yönündə davamlı addımlar atırdıq. Cənab prezident İlham Əliyevin rəhbərliyi altında həyata keçirilən iqtisadi, ordu quruculuğu, diplomatik siyasət bu qələbəni şərtləndirdi. Cənab prezident istər beynəlxalq tribunalarda istər xarici ölkələrə səfərlərində Ermənistanın işğalçı ölkə olduğunu dünyaya bəyan edirdi. O hər çıxışında bu məsələyə toxunur, düşmənin vandal siyasəti haqqında geniş ictimayyətə məlumat verirdi. Eyni zamanda bu müddət ərzində Azərbaycan bir çox beynəlxalq təşkilatlarla sıx əməkdaşlıq edib. İstər ATƏT, istər BMT, istərsə də İslam Əməkdaşlıq Təşkilatı ilə qurulan xoş münasibət Azərbaycanın haqq işində beynəlxalq dəstəyin qazanmasına şərait yaratdı. Bilirsiniz ki, Azərbaycan ötən ildən Qoşulmama Hərəkatına sədrlik edir. Ölkəmizin bu təşkilata sədrliyi BMT-də Vətən Müharibəsi ilə bağlı Azərbaycan əleyhinə qətnamənin qəbul olunmamasına səbəb oldu. Bütün bunlarla yanaşı müharibə dövründə cənab Prezidentin 26 beynəlxalq KİV-ə verdiyi müsahibələr informasiya siyasətinin düzgün qurulmasından xəbər verirdi ki, müharibə dövründə bu ən önəmli silahlardandır. Baxmayaraq ki, həmin müsahibələrdə qərəzli suallar var idi, ancaq cənab Prezident bu suallara tutarlı cavab verməyi ilə bir daha öz liderlik bacarığını ortaya qoymuş oldu. Qələbəmizi şərtləndirən ən önəmli amillərdən birincisi ordu quruculuğudur ki, Azərbaycan hökuməti bu istiqamətdə kifayyət qədər müsbət addımlar atıb. İstər ordumuzun maddi texniki bazasının yaxşılaşdırılması, istər müasir döyüş silahlarının alınması və onlardan istifadə qaydalarının öyrənilməsi və ən əsası orduda ruh yüksəkliyinin olması qələbəmizi təmin etdi. Artıq bir sıra öndə gedən dövlətlərin ordu rəhbərliyi Azərbaycan Ordusunun bacarığını öyrənməyə başlayıblar. Mən qələbənin ideoloji bazasına xalq-iqtidar birliyinə də toxunmaq istəyirəm. Bu bazanın olması, milli maraqlar məsəlləsində hər kəsin vahid mövqedən çıxış etməsi, yumruq kimi birləşməyimiz, Azərbaycan xalqının cənab Prezident İlham Əliyevə olan yüksək güvəncindən irəli gəlir. Biz birlikdə güclüyük devizi sözün əsl mənasında yumruq kimi birləşib düşməni öz dədə baba torpaqlarımızdan qovmağa əsas verdi.

 -Çətin əldə olunan qələbə bəzi dairələri narahat edir...

 -Vətən Müharibəsində biz kimin kim olduğunu gördük. Qardaş Türkiyə bu məsələdə Azərbaycan əsl qardaşlıq dəstəyini göstərdi. Pakistan, Ukraynanı da buna misal olaraq göstərmək olar. Bununla yanaşı  öz çirkin niyyətlərini gizlədə bilmədilər. Üzdəniraq bəzi Qərb dövlətləri Azərbaycanın qələbəsini həzm edə bilmirlər. Ancaq mən sizə deyim ki, onlar nə edirlər etsinlər ortada reallıq var. Bu reallığı cənab İlham Əliyev yaratdı. Artıq heç nə dəyişməyəcək. Yaxşı olar ki, həmin ölkəllər  öz "demokratik”, "insan haqqlarını tanıyan” ölkə kimi öz qərəzlərini bir kənara qoysunlar. Baxın müharibə dövründə düşmən milki şəxslərə qarşı dünyada istifadəsi qadağan olunmuş raketlərdən hücum etdi. Nəticədə Gəncədə, Bərdədə, eləcədə digər regionlarda mülki şəxslər həlak oldu. Bununla bağlı artıq cinayət işi də açılıb. Ölkəmizdə fəaliyyət göstərən diplomatik korpusun nümayəndələdi də məlumatlandırılıb. Ancaq bütün bunlara baxmayaraq "demokratik ölkələr" bu yöndə düşmən ölkəyə qarşı bəyanat səsləndirməyiblər. Təbii ki, bütün bunlar təbii ki, təəssüf doğurur.    

-Qələbə paradına çox yüksək səviyyədə hazırlıq işləri görülür. Bu paradı xalqımız uzun illərdir gözləyirdi. Bu təkcə son 30 ilin qələbə paradı deyil. Tarixə nəzər salanda məlum olur ki, son əsrlərdir ki, və xüsusən Nadir şahın, şah İsmayılın  qurduqları imperiyaların süqutundan sonra Azərbaycan torpaqları hissə-hissə işğal olunub və biz bu torpaqları işğaldan azad edə bilməmişik. Ona görə də bu son 30 ilin deyil son əsrlərin qələbə paradıdır. Ölkə başçımız, Ali Baş Komandanımız, Ordumuz igid əsgərlərimiz tarix yazdılar. Bu tarix də 10 dekabrda keçiriləcək qələbə paradında öz əksini tapacaq. Fəxr edəcəyimiz, qürur hissi keçirəcəyimiz bir paraddır. Bu təkcə qələbə paradı deyil. Bu parad həmdə xalqı özünü dərki, sınmış qürurunun özünə qaytarılması deməkdir. Bu gün Azərbaycan dövləti, xalqı qalib xalqdır. Bu gün cənab Prezident qalib prezidentdir. Biz onunla fəxr edirik, qürur duyuruq.

 -Cənab Prezidentin təşəbbüsü ilə reallaşan BMT TŞ-nın iclasında Azərbacyan öz qətiyyətini bir daha nümayiş etdirdi. Ümumən bundan sonra bu kimi beynəlxalq tribunaların Ermənistana olan münasibətində hər hansı dəyişiklik gözləmək olarmı?

- Cənab Prezidentin təşəbbüsü ilə BMT TŞ-nın xüsusi iclası keçirildi. Bu xüsusi iclas COVID-19 pandemiyasına qarşı dünya ölkələrinin birgə çıxış etməsi, sülh mesajı kimi qiymətləndirilir. Məlumat üçün deyim ki, belə xüsusi iclasın çağırılması çox nadir hallarda baş verir. BMT-yə üzv dövlət liderlərinin cənab Prezidentin təşəbbüsünü yüksək qiymətləndirərək ona dəstək olması Azərbaycan Prezidentinə yüksək hörmətin təzahürüdür. Qoşulmama Hərəkatının sədri kimi iclasda çıxış edən cənab prezident İlham Əliyev Azərbaycanın sülhsevər ölkə olduğunu qeyd etdi. Erməni vandalları törətdiyi terrordan danışdı. Məlumatınız var ki, xüsusi iclasla bağlı sülh təşəbbüsünə qarşı çıxan yeganə ölkə Ermənistan oldu. Sülh təşəbbüsü olduğu halda Ermənistan özünün məkrli siyasətini bir daha göstərdi. Onların bu məkrlərinə isə Müzəffər Azərbaycan Ordusu lazımi cavab verdi. 44 gün ərzində düşmən nəinki işğal etdiyi ərazini dövlətini, iqtisadiyyatını itirdi. İnanmıram ki, Ermənistan bir daha səhvə yol verə. Onları dalandan çıxması üçün Azərbaycana yalvarmalıdırlar.

-COVİD-19 pandemiyasının artım tempi bütün dünya üzrə yüksələn xətt üzrə gedir. Bu istiqamətdə seçicilərinizə hər hansı çağırışınız olubmu?

-COVİD-19 dünyanın düzənini dəyişib. Azərbaycanda bu istiqamətdə intensiv işlər həyata keçirilir. Bildiyiniz kimi bu yöndə Fond yaradıldı. Fonda kifayyət qədər vəsait toplanıldı. Pandemiyanın birinci dalğasında Azərbaycan bir daha dünyaya nümunə göstərdi. "Biz birlikdə güclüyük!” devizi bizi bu bəladan minimum itkilərlə cıxmamıza səbəb oldu.  İndi artıq pandemiyanın ikinci dalğası müşahidə olunmaqdadır. Bir sıra dövlətlərdə yoluxma və ölüm halları kəskin surətdə artır. Təəssüflər olsun ki, bizdə də həm yoluxma həm də ölüm hallarından artım var. Ancaq düşünürəm ki, yaxın günlərdə bu tendensiyada geriləmə olacaq. Mən təkcə öz seçicilərimə deyil bütün vıtəndaşlara səslənirəm ki, bu yöndə elan olunan qaydalara əməl edin. 3 sadə prinsipi əsas götürərək işlərinizi bu çərçivədə həll edin. Bu artıq zamanın təlləbidir.

Ədil Ədilzadə