Dövlət müstəqilliyi bərpa edildikdən sonra Azərbaycanı tanıyan dövlətlərdən biri də Almaniya oldu. Azərbaycanla Almaniya arasında siyasi münasibətlər iqtisadi, mədəni münasibətlər formatında genişləndi. Qarşılıqlı əlaqələr sonrakı dövrlərdə mahiyyət baxımından xeyli möhkəmləndi.
Aprelin 2-də Almaniya Federativ Respublikasının Prezidenti Frank-Valter Stanmayerin Azərbaycana rəsmi səfəri də bu münasibətlərin qarşılıqlı ehtirama əsaslandığının təsdiqidir. Rəsmi səfərdə Azərbaycan Respublikasının Prezidenti cənab İlham Əliyev mətbuata verdiyi bəyanatda da ikitərəfli münasibətlərin bundan sonra daha da inkişaf edəcəyini bildirərək qeyd etdi ki, bu iki dövlət arasında münasibətlər sistemində belə səfərlərin əhəmiyyəti böyükdür.
Dövlət başçımız bəyanatda dedi: “Həm təkbətək görüşdə söhbət əsnasında, həm də nümayəndə heyətlərinin iştirakı ilə apardığımız danışıqlarda Almaniya-Azərbaycan əlaqələrinin gələcək inkişafı müzakirə edilmişdir. Mən tam əminəm ki, bu səfər bizim əlaqələrimizə yeni müsbət təkan verəcəkdir. İqtisadi sahədə əldə edilmiş nəticələr bizi təbii olaraq ruhlandırır. Çünki bu ilin yanvar-fevral aylarında bizim ticarət dövriyyəmiz təxminən üç dəfə artıb. Bunun əsas səbəbi Azərbaycandan Almaniyaya ixrac edilən xam neftin həcminin artması olmuşdur. Ona görə biz hesab edirik ki, gələcək illərdə öz ticarət dövriyyəmizin şaxələndirilməsi ilə bağlı daha fəal addımlar atmalıyıq, xüsusilə bərpaolunan enerji sahəsində - harada ki, Almaniya şirkətlərinin çox böyük təcrübəsi var, Azərbaycanın da çox böyük proqramı, planları var. Biz xarici investorların sərmayəsi hesabına 2030-cu ilə qədər bərpaolunan enerji növlərinin istehsal gücünü 6 giqavata çatdırmaq fikrindəyik və bu, tam realdır, bunun bir hissəsi Avropaya ixrac ediləcəkdir”.
Bəyanatda Azərbaycan gerçəklikləri haqqında da müfəssəl məlimat verən Azərbaycan Respublikasının Prezidenti cənab İlham Əliyev son 30 ilin siyasi vəziyyətinin Ermənistanın ərazi iddiasına görə hərbi vəziyyət yaratdığını, Ermənistanın Azərbaycana qarşı elan etmədən müharibəyə başladığını, Azərbaycan Ordusunun ədalətli müharibə ilə torpaqlarımızı işğaldan azad etdiyini bildirən dövlət başçımız dedi: “Bizim xalqımız etnik təmizləməyə məruz qalmışdır. Bir milyon azərbaycanlı erməni aqressiyasına görə evsiz-eşiksiz qalmışdır və torpaqlarımızın təxminən 20 faizi işğal altına düşmüşdür. Əfsuslar olsun ki, beynəlxalq təşkilatlar bu məsələ ilə bağlı ciddi addım atmamışlar. Azərbaycan bu münaqişəni və beynəlxalq hüququ özü döyüş meydanında və siyasi müstəvidə həll etmişdir. Məhz bu tarixi Zəfərimiz sülh danışıqlarına yol açmışdır. Hesab edirəm ki, bu gün Azərbaycanın və Ermənistanın sülhün əldə edilməsində mövqeləri bir-birinə kifayət qədər yaxınlaşmışdır. Eyni zamanda, bu gün digər beynəlxalq məsələlər də müzakirə edildi, o cümlədən Amerika-Avropa İttifaqı gərginliyi, Rusiya-Qərb gərginliyi. Bütün bu məsələlər təbii olaraq bütün dünyaya təsir edir və səmimi fikir mübadiləsi aparmaq mənim üçün çox önəmli idi. Əminəm ki, bu səfərin çox müsbət nəticələri olacaqdır. İkitərəfli münasibətlərimizin tarixində bu, Almaniya Prezidentinin Azərbaycana birinci rəsmi səfəridir. Əminəm ki, səfərin yekunları bizim ölkələrimizi bir-birinə daha yaxın edəcəkdir”.
Rəsmi səfər çərçivəsində Azərbaycan Respublikasının Prezidenti cənab İlham Əliyev yerli və xarici jurnalistlərin suallarını cavablandırdı. Dövlət başçımızın suallara verdiyi cavablar Azərbaycanının müharibədən sonrakı xarici siyasətinin mahiyyətini ifadə etdi...
Bu rəsmi səfər də, rəsmi səfər zamanı Azərbaycan Respublikasının Prezidenti cənab İlham Əliyevin mətbuata bəyanatı da, jurnalistlərin suallarını əhatəli və məzmunlu cavablandırması da Azərbaycanın dünyəvi, bəşəri dövlət olduğunun təsdiqi kimi tarixləşdi...
Səbinə XASAYEVA,
Milli Məclisin deputatı
