Sumqayıt Şəhər İcra Hakimiyyəti, Ailə, Qadın və Uşaq Problemləri üzrə Dövlət Komitəsi, STP Şirkətlər Qrupunun birgə təşkilatçılığı və Milli Məclisin deputatı Mehriban Vəliyevanın təşəbbüsü ilə akademik Zərifə Əliyevanın anadan olmasının 102-ci ildönümünə həsr olunmuş “Uğurlu qadın olmağın sirri” adlı tədbir keçirilib.
Muğam Mərkəzində keçirilən tədbirdə Sumqayıt Şəhər İcra Hakimiyyətinin başçısı Zakir Fərəcov, tarix elmləri doktoru, professor Dilarə Seyidzadə, Ailə, Qadın və Uşaq Problemləri üzrə Dövlət Komitəsinin sədri Bahar Muradova, Milli Məclisin Ailə, qadın və uşaq məsələləri komitəsinin sədri, professor Hicran Hüseynova, Milli Məclisin deputatları Tahir Mirkişili, Elnarə Akimova, Səbinə Salmanova, Zaur Şükürov, STP Şirkətlər Qrupunun nümayəndələri, həkimlər, müəllimlər və Sumqayıt ictimaiyyəti iştirak ediblər.
Tədbirdən öncə iştirakçılar üçün sərgi nümayiş etdirilib. Daha sonra tədbir Ulu Öndər Heydər Əliyevin, akademik Zərifə Əliyevanın və torpaqlarımızın bütövlüyü uğrunda şəhid olmuş qəhrəmanların xatirəsinin bir dəqiqəlik sükutla anılması və Azərbaycan Respublikasının Dövlət Himninin səsləndirilməsi ilə başlayıb.
Tədbiri Milli Məclisin deputatı Mehriban Vəliyeva açaraq akademik Zərifə Əliyevanın həyat və fəaliyyəti barədə məlumat verib. O, Zərifə xanımın timsalında uğurlu Azərbaycan qadınının cəmiyyətə və ailəyə verdiyi töhfələrin gənc nəslə nümunə olduğunu vurğulayıb. STP Şirkətlər Qrupunun “Zərif mühəndislər” və “Sabahın gücü” layihələrinin iştirakçısı olan qadın mühəndislərin uğurlarından bəhs edib. Zərifə xanımın uğur sirrinin zəhmət, sədaqət və insanlara olan məhəbbətdən keçdiyini qeyd edib və layihə iştirakçılarına uğurlar arzulayıb.
Daha sonra Zərifə Əliyeva haqqında videoçarx nümayiş etdirilib.
Tədbirin qonağı, professor Dilarə Seyidzadə Ulu Öndər Heydər Əliyev və Zərifə xanım Əliyeva ilə bağlı xatirələrini bölüşüb. Ailə, Qadın və Uşaq Problemləri üzrə Dövlət Komitəsinin sədri Bahar Muradova Zərifə xanımın oftalmologiya sahəsindəki uğurlarından danışıb və onun ailə dəyərlərinə sadiqliyinin, milli-mənəvi dəyərlərin qorunmasında nümunəvi fəaliyyətinin bu gün də davam etdirildiyini bildirib.
Milli Məclisin Ailə, qadın və uşaq məsələləri komitəsinin sədri, professor Hicran Hüseynova da Zərifə xanımın həyat yolundan və onun qadınların cəmiyyətdəki rolunun artmasına verdiyi töhfələrdən bəhs edib.
Sumqayıt Şəhər İcra Hakimiyyətinin başçısı Zakir Fərəcov çıxışında akademik Zərifə xanım Əliyevanın elmə, cəmiyyətə və ailəyə verdiyi misilsiz töhfələrdən bəhs edib. Zakir Fərəcov bildirib ki, Zərifə xanımın həyat yolu Azərbaycan qadını üçün örnək məktəbdir. O, təkcə tibb sahəsində deyil, eyni zamanda insanlara olan münasibəti, yüksək mənəviyyatı və nümunəvi ailə dəyərləri ilə də hər zaman seçilib. Zakir Fərəcov gənclərə müraciət edərək, milli-mənəvi dəyərlərə sadiq qalmağı, təhsilə, elmə və zəhmətə önəm verməyi tövsiyə edib.
Tədbir daha sonra panel müzakirəsi ilə davam edib. Panel öncəsi “Sabahın gücü” layihəsinin məzunu Nərgiz Qafarova layihə və tədbir haqqında məlumat verib, sonra isə gənclərin suallarını panel iştirakçılarına ünvanlayıb. Paneldə deputatlar Səbinə Salmanova, Elnarə Akimova, Prezident təqaüdçüsü, əməkdar müəllim Ofelya Babayeva və əməkdar həkim Təranə Rəcəbli gənclərin suallarını cavablandırıblar.
Tədbir Sumqayıt Musiqi Kollecinin hazırladığı bədii hissə ilə yekunlaşıb.
