Azərbaycan dünyanın əksər dövlətləri ilə qarşılıqlı münasibətlər saxlayır. Bu münasibətlər, əsasən, bəşəri niyyətlərə söykənir. Azərbaycanla Ərəb Dövlətləri Liqası arasında əlqələr yeni mərhələyə qədəm qoydu. Bu Liqanın əksər rəsmi tədbirlərində Azərbaycan da iştirak edir.
Əlcəzairdə Ərəb Dövlətləri Liqasının 31-ci Zirvə toplantısının açılış mərasimində fəxri qonaq kimi Azərbaycan Respublikasının Prezidenti cənab İlham Əliyevin də iştirakı təsdiqləyir ki, bu Liqa Azərbaycanla əlaqələri daha da möhkəmləndirir.
Tədbirdə Azərbaycan Respublikasının Prezidenti cənab İham Əliyev çıxışında bildirdi ki, burada Qoşulmama hərəkatının sədri kimi iştirak edir, həm də Azərbaycanın Ərəb Dövlətləri Liqasına üzv olan dövlətlərlə səmimi münasibətləri var.  “Əminəm ki, yaxın gələcəkdə də bizim əməkdaşlığımız genişlənəcək,  yeni xarakter və yeni dinamika alacaq. Biz Ərəb Dövlətləri Liqasına üzv olan ölkələrlə ikitərəfli əməkdsşlığa da xüsusi önəm veririk. Biz aramızda olan qarşılıqlı dəstəyi və həmrəyliyi yüksək qiymətləndiririk”. Ölkə başçımızın dediyi digər fikirlər  bu günkü gerçəkliyi də əks etdirir, sabahların gerçəkliklərinə də işıq salır: “Qoşulmama Hərəkatının sədri kimi Azərbaycan beynəlxalq arenada mühüm rol oynayır. 120 ölkəni bir araya gətirən Qoşulmama Hərəkatı BMT-dən sonra ikinci ən böyük beynəlxalq təsisatdır. Azərbaycan 2019-cu ildən bu təsisatın sədridir və biz bütün üzv dövlətlərin yekdil səsi ilə seçilmişdik. Bu da bizim mövqeyimizə və siyasətimizə yüksək səviyyəli dəstəyi və rəğbəti nümayiş etdirir. Bizim sədrliyimiz bir daha yekdil qərarla 2023-cü ilin sonuna qədər uzadılmışdır. Biz bunu bir daha siyasətimizə verilən qiymətin əlaməti kimi görürük. Qoşulmama Hərəkatının  Ərəb Dövlətləri Liqasına üzv olan dövlətlərlə çox yaxşı münasibətləri var. Yaxın gələcəkdə bizim əməkdaşlığımız genişlənəcək, yeni xarakter və yeni dinamika alacaq...”.
Tarixi hadisələr, faktlar çağdaş siyasi əməkdaşlıqda önəmli rol oynayır.
Ərəb Dövlətləri Liqası ilə Azərbaycan arasındakı münasibətlərin xüsusi xarakteri var. Azərbaycan 2006-cı ildən təşkilatın müşahidəçi statusunda üzvüdür və biz əməkdaşlığımızı genişləndirmək istəyirik.
Son illərdə Ermənistan ərəb ölkələri ilə əlaqələrin gücləndirilməsi üçün bütün mümkün vasitələrdən istifadə edir. Sammitdə Azərbaycan Respublikasının Prezidenti cənab İlham Əliyevin dünyəvi bəşəri siyasət naminə prinsipiallıqla Fransanı ifşa etməsi dinc dünya üçün görülməli işlərin mahiyyətinin göstəricisi kimi dinlənildi...
“Bəzi hallarda BMT Təhlükəsizlik Şurasının qətnamələri bir neçə gün ərzində icra olunur. Amma bizə gəldikdə bu qətnamələr otuz il ərzində kağız üzərində qaldı. Bu, ikili standartdır, bu, yolverilməzdir. Bu, beynəlxalq hüququn norma və prinsiplərinə, ölkələrin öhdəliklərinə selektiv yanaşmadır. Buna görə də ədalətsizlikdən və işğaldan əziyyət çəkmiş bir ölkə kimi Azərbaycan münaqişələrə dair yanaşmaların birləşdirilməsi işinə töhfə vermək üçün aktiv şəkildə fəaliyyət göstərir. Münaqişələrə yanaşmalarda ikili standart olmamalıdır. İşğal işğal adlandırılmalıdır”, - Azərbaycan Respublikasının Prezidenti cənab İlham Əliyevin sammitdə dediyi bu fikirlər də dünyanın dincliyinin necə saxlanılmasına yönəldilmiş siyasi təklifdir, əslində, siyasi düsturdur...
Azərbaycan Respublikasının Prezidenti cənab İlham Əliyevin Ərəb Dövlətləri Liqasının 31-ci Zirvə toplantısında iştirakı dövlət olaraq Azərbycanın, siyasi xadim olaraq cənab İlham Əliyevin nüfuzunun göstəricisidir. Ərəb dövlətləri kimi dünyanın digər dövlətləri də gördü və əmin oldu ki. Azərbaycan xalqının milli və dünyəvi azadlıq ideallarına sadiqdir, bu bəşəri dövlət müstəmləkəçiliyə və onun bütün formatlarda təzahürlərinə qarşı mübarizə aparmaqdadır. Aparacaq da...
 
Səbinə XASAYEVA,
Milli Məclisin deputatı