Şəhid pilot “Azərbaycan Bayrağı”na layiq görüldü

Ötən gün prezident İlham Əliyevin imzaladığı sərəncamla döyüşlərdəki şücaətinə görə bir qrup hərbçi təltif edilib.


AzVision.azxəbər verir ki, aprelin əvvəlində cəbhədə baş verən döyüşlərdə qəhrəmancasına şəhid olan pilot mayor Urfan Vəlizadə də təltif edilib.

Şəhid pilotun qardaşı Vidadi Vəlizadənin saytımıza verdiyi məlumata görə, Urfan Vəlizadə "Azərbaycan Bayrağı”na layiq görülüb.

Bundan başqa aprelin 2-nə keçən gecə düşmən əlində olan starteji əhəmiyyətli Talış yüksəkliyinin geri alınmasında qəhrəmancasına döyüşən və ağır yaralanan Asif Novruz oğlu Rəsulov da ölkə başçısı tərəfindən təltif edilib.

O, xidmətdə fərqləndiyinə görə medalla təltif edilib.

Qeyd edək ki, A.Rəsulov hazırda Müdafiə Nazirliyinin Mərkəzi Hərbi Klinik Hospitalında müalicə olunur. Talış yüksəkliyi uğrunda gedən döyüşlərdə qəhrəmancasına döyüşən Asif 7 erməni əsgərini məhv edib

Qeyd edək ki, ötən gün ölkə başçısı Azərbaycan Respublikasının ərazi bütövlüyünün qorunub saxlanması, erməni işğalçılarının 2016-cı il aprelin 2-dən 5-dək qoşunların təmas xəttində törətdikləri silahlı təxribatların qarşısının alınması və düşmənin dinc əhaliyə hücumlarının dəf edilməsi zamanı göstərdikləri qəhrəmanlıq və igidliyə görə hərbçilərin xüsusi fərqlənən bir qrupunu Azərbaycan Prezidentinin müvafiq sərəncamları ilə yüksək fəxri adlara layiq görüb, orden və medallarla təltif edib.