Aprelin 22-də Azərbaycan Dillər Universitetində Fransa tarixçisi və hüquqşünası Jorj dö Malevilin Azərbaycan dilinə tərcümə edilmiş kitabının təqdimat mərasimi keçirilib. "1915-ci il erməni faciəsi” adlı kitabı Azərbaycan dilinə millət vəkili, Mətbuat Şurası Beynəlxalq Əlaqələr Komissiyasının sədri, Cavanşir Feyziyev tərcümə edib. Təqdimatda yazıçı Çingiz Abdullayev, yazıçı-publisist Yunus Oğuz, Mətbuat Şurasının sədri Əflatun Amaşov, şair Elçin Mirzəbəyli, millət vəkilləri Musa Qasımlı, Fuad Muradov, ADU-nun prorektpru Vazeh Əsgərov, Türkiyənin Azərbaycandakı səfirinin müşaviri Seyid Əhməd Arslan, Fransanın Azərbaycandakı səfiri Paskal Mönye, yazıçılar, tarixçilər, KİV rəhbərləri, tələbələr və müəllimlər iştirak ediblər. Yazıçı Çingiz Abdullayev çıxışında ermənilərin zaman-zaman Türkiyə və Azərbaycan türklərinə qarşı törətdiyi vəhşiliklərdən danışıb və qondarma erməni soyqırımının 100 illi ərəfəsində belə bir kitabın Azərbaycan dilinə tərcümə olunmasının əhəmiyyətini diqqətə çatdırıb. Ç.Abdullayev qeyd edib ki, kitab Azərbaycan dili ilə yanaşı ingilis, rus və digər xarici dillərə də tərcümə edilməlidir. Yazıçı həmçinin ermənilərin uydurma iddialarının təbliğatına qarşı rəsmi olmaqla yanaşı, həm də digər vasitələrlə hücum etməyin vacibliyini qabağa çəkib. Millət vəkili Musa Qasımlı isə çıxışında qeyd edib ki, ermənilər özlərini dünyaya "məzlum millət” kimi təqdim etməyə çalışır. Ermənistan və bir sıra ölkələrin Türkiyənin arxivlərin açılması təklifinə yaxın gəlmədiklərini deyən Musa Qasımlı vurğulayıb ki, arxivlərin açılması ermənilərin 100 illik yalanlarının ifşa olunması demək olacaq. O, həmçinin arxivlərdə erməni iddialarını ifşa edəcək kifayət qədər dəlillərin olduğunu da diqqətə çatdırıb. Qeyd edib ki, ermənilərin qondarma soyqırım təbliğatının qarşısının alınmasında Türkiyənin üzərinə böyük yük düşür. Millət vəkili bu işdə Azərbaycanın həmişə qardaş ölkəyə yardım etdiyini və bu yardımın bundan sonra da davam edəcəyini deyib. Millət vəkili Fuad Muradov isə bildirib ki, 1915-ci il hadisələrinin obyektiv qiymətləndirilməsi üçün müxtəlif nəşrlər və kitabların sayı artırılmalıdır. F.Muradov gəncləri bu işdə sosial şəbəkələrdə və digər fəaliyyət sahələrində aktiv olmağa çağırıb. Türkiyə səfirliyinin rəsmisi Seyid Əhməd Arslan çıxışında XX əsrin əvvəllərində ermənilərin milyonlarla müsəlman və türkü qətlə yetirdiklərini bildirib. O, qeyd edib ki, milyonlarla günahsız insanların qətllərində erməni vəhşiliyinin izləri var. Ə.Arslan qondarma erməni soyqırımı barədə iddiaların əsassız və 1915-ci ildə baş verənlərin soyqırım olmadığını sözlərinə əlavə edib. Müşavir Azərbaycanın bu yöndə Türkiyəyə verdiyi dəstəyə görə, öz təşəkkürünü bildirib. Fransa səfiri Paskal Mönye çıxışında vurğulayıb ki, müharibə şəraitində müəyyən itkilərin olması təbii hadisədir. O, Fransa və Almaniya arasında müxtəlif dövrlərdə baş verən müharibələrdə milyonlarla insananın həlak olduğunu deyib. Səfir həmçinin bildirib ki, 90-cı illərin əvvəllərində Ermənistanın Azərbaycan ərazilərinə hücumu nəticəsində çoxlu sayda azərbaycanlı öldürülüb. O, Xocalıda bir gecənin içində 613 nəfər azərbaycanlının ermənilər tərəfindən qətlə yetirldiyini də diqqətə çatdırıb. Paskal Mönye suverenliyinin qorunmas üçün Fransanın həmişə Azərbaycanın yanında olacağını vurğulayıb.

Qeyd edək ki, "1915-ci il Erməni faciəsi” kitabında Jorj dö Malevil 1915-ci ildə Osmanlı İmperiyasında baş verən hadisələrdə ermənilərin soyqırıma məruz qalmadıqlarını bildirir.