"Prezidentin yanında İctimai Palatanın (ya da Məsləhət Şurası) yaradılması təklifini vermişdik və bu gün də qüvvədədir”.

Azərbaycan Xalq Cəbhəsi Partiyasının (AXCP) sədri Razi Nurullayev hökumətə təkliflə müraciət edib. Sədr qeyd edib ki, təklif olunan "İctimai Palata”nın tətbiq edilməsi mövcud sosial-iqtisadi, eləcə də siyasi böhrandan çıxmaq üçün olduqca vacibdir:

"Prezident yanında siyasi partiyaların, QHT-lərin, nüfuzlu ictimai-siyasi xadimlərin iştirakı ilə formalaşdırılan "Məsləhət Şurası”nın yaradılması prezidentin də informasiya blokadasından çıxarılmasına və bir çox problemli siyasi, sosial və iqtisadi məsələlərin həllində olan inhisarı aradan qaldırmış olar. Rusiyada bu təcrübə var və həmin təcrübənin öyrənilərək tətbiq edilməsində də fayda var.

Prezident yanında müxtəlif qurumlar yaradılır və demək olar ki, eyni adamlar və yaxud eyni qurumların eyni və ya fərqli adamları təmsil olunurlar. Bu cür yanaşmanın fayda gətirəcəyinə böyük şübhələrim var. Fərqli fikir, fərqli düşüncə və fərqli yanaşma tərzinə malik insanların iştirakı vacibdir. Etiraz edən, fərqli konsepsiya irəli sürən və hər şeylə razılaşmayan beyinlərə ehtiyac var. Sovet dövründə olduğu kimi, bir ağızdan qatığa qara deyənlər nəsli yetişdirilir.

Ölkənin gələcəyini düşünmək və vəziyyətdən çıxış yollarını tapmaq üçün Prezidentin yanında "İctimai Palata”nın (ya da Məsləhət Şurası) yaradılmasına hakim elitanın qulaq verməsini istəyirik”.