Yeni dünya düzəninin formalaşdığı ərəfədə Azərbaycanın regionda yeri və rolu durmadan artmaqdadır. Görünən odur ki, ölkəmiz bu prosesdə önəmli geosiyasi mövqeyə malikdir. Bir sıra inkişaf etmiş ölkələr də Azərbaycanla əməkdaşlıqda maraqlıdır. Almaniya Federativ Respublikasının Prezidenti Frank-Valter Staynmayerin Azərbaycana rəsmi səfəri də bu səpkidə həyata keçirilən siyasətin tərkib hissəsidir. Regiona səfəri çərçivəsində Bakıda önəmli açıqlamaları ilə Almaniya Prezidenti iki ölkə arasında olan münasibətlərin dərinləşməsinə işarə etdi. “Qarabağ Azərbaycandır, bu, rəsmi Berlinin birbaşa və aydın mövqeyidir”. fikirlərini davam etdirən F.Ştaynmayer 30 il ərzində Azərbaycan ərazilərini işğal etməsinə görə Ermənistana qarşı niyə heç bir tədbir görülmədiyinə dair suala cavab verərkən bildirib.
Rəsmi səfərdə Azərbaycan Respublikasının Prezidenti cənab İlham Əliyev mətbuata verdiyi bəyanatda da ikitərəfli münasibətlərin bundan sonra daha da inkişaf edəcəyini bildirərək qeyd etdi ki, bu iki dövlət arasında münasibətlər sistemində belə səfərlərin əhəmiyyəti böyükdür.
Azərbaycan Almaniya iqtisadi, enerji və digər sahələrdə əməkdaşlığın tarixi keçmişi əlaqələrin inkişaf mərhələsində olduğunu deməyə əsas verir ki, Almaniya Bakının iqtisadi potensialından xəbərdardır və Azərbaycana regionda mühüm tərəfdaş kimi baxır.
Xatırladaq ki, Prezident İlham Əliyevin indiyədək Almaniyaya iki rəsmi, 10-dan artıq işgüzar səfəri olub. Almaniya Azərbaycanı Cənubi Qafqazda vacib tərəfdaş kimi qəbul edir, ölkəmizin regionda lider mövqeyini, həmçinin beynəlxalq səviyyədə tanınmış sərhədləri daxilində suverenliyini və ərazi bütövlüyünü tam dəstəkləyir. Almaniya Prezidenti Frank-Valter Ştaynmayer mətbuata bəyanatından sonra jurnalistlərin suallarını cavablandırarkən bu mühüm amili xüsusi vurğuladı ki, biz regionda qeyri-sülh şəraiti ilə heç vaxt barışmamışıq. Bir tərəfin digər tərəfə ərazi iddialarına heç vaxt dəstək verməmişik. Beynəlxalq səviyyədə tanınmış sərhədlər qüvvədə olmalıdır, tanınmalıdır və onlara hörmətlə yanaşılmalıdır. Almaniyanın mövqeyinə gəldikdə öz xəttimizə, mövqeyimizə həmişə sadiq olmuşuq. Azərbaycanla Ermənistan arasında sülh müqaviləsinin imzalanması məsələsinə gəldikdə isə Frank-Valter Ştaynmayer qeyd etdi ki, istəyirik iki dövlət arasında qeyri-sülh dövrü geridə qalsın və sabitlik gətirəcək yeni bir gələcək yaransın. Həm Ermənistan, həm də Azərbaycan üçün Cənubi Qafqaz sülhün bərqərar olduğu regiona çevrilməlidir.
Səfərin mühüm tərəflərindən biri də Orta Dəhliz layihəsi və bu layihədə Azərbaycanın rolu, ölkələrimiz arasında enerji sahəsində əməkdaşlıq məsələlərinin müzakirə olunması, yaşıl enerji ilə bağlı əməkdaşlığa toxunulmasıdır ki, bütün bunlar Azərbaycan Almaniya siyasi-iqtisadi əlaqələrinin daha da dərinləşməsinə gətirib çıxaracaq.
Mətanət Səfərli
YAP Nəsimi Rayon Təşkilatının əməkdaşı
