"Azərbaycanla Ermənistan arasında sülh danışıqları üzrə razılıq əldə olunduğu bir dövrdə Ermənistan şərti sərhəddə atəşkəsi pozmaqla təxribat törədir".

Sabahinfo.az xəbər verir ki, bunu "Unikal"a açıqlamasında deputat Azər Badamov deyib. O bildirib ki, bu, Ermənistanın reallıqda sülh niyyətində olmadığını göstərir:

"Ermənistan həm silahlanır, həm də şərti sərhəddə atəşkəsi pozur. Həmçinin, sülhlə bağlı təklifləri qəbul etdiyini bildirir. Bunlar bir-birinə zidd məsələlərdir. Ermənistanın hərəkətləri onların sülhə hazır olmadığını və müharibəyə hazırlaşdığını göstərir. Onlar anlamalıdırlar ki, Azərbaycanla heç vaxt yenidən müharibə edə bilməzlər. Azərbaycan Ordusu hər gün daha da güclənir. Ermənistan müxtəlif ölkələrdən yeni silahlar alır, təlimlər keçir. Bunlara baxmayaraq, Azərbaycan Ordusu döyüş qabiliyyətini yüksək səviyyədə saxlayır və günü-gündən artırır. Əgər Ermənistan tərəfindən davamlı təxribat hərəkətləri müşahidə olunarsa, ölkəmizin suverenliyi üçün təhlükə yaradarsa, cavabımız ciddi və qəti olacaq. Bu, Ermənistan üçün ağır faciə ilə nəticələnə bilər. Yaxşısı odur ki, Ermənistan sülh müqaviləsi ilə bağlı bildirdiyimiz təklifləri reallıqda həyata keçirsin, təxribatlardan əl çəksin, silahlanmaya üstünlük verməsin və regionda sabitliyin yaranması istiqamətində addımlar atsın".