Aqşin Əliyev: "Həmin rejimin yürütdüyü siyasət Ermənistanı tam izolyasiya şəraitinə sürükləyib"

"Bundan əlavə, ailələr övladlarını bilərəkdən ölkədən çıxarır ki, onlar gedib lazımsız müharibədə ölməsin"

"Ermənistanın Avrasiya İqtisadi Birliyinə qoşulması ölkədə demoqrafik böhrana səbəb olub. Ermənistan sürətlə boşalır. Ölkə əhalisi işləmək üçün Rusiyaya üz tutur".

Bunu "Rossiya Seqodnya" agentliyində keçirilən "Cənubi Qafqazın Avrasiya gələcəyi. Avrasiya İqtisadi Birliyi himayəsi altında inteqrasiya perspektivləri" adlı Moskva-İrəvan videokörpüsündə Rusiya Elmlər Akademiyasının Dünya İqtisadiyyatı və Beynəlxalq Münasibətlər İnstitutunun elmi əməkdaşı, Qafqazşünaslar Elmi Cəmiyyətinin prezidenti, politoloq Aleksandr Krılov bildirib. A.Krılov deyib ki, Avrasiya İqtisadi Birliyinə qoşulmağın Ermənistan üçün bir çox ziddiyyətli məqamları var: "Belə ki, Ermənistan Avrasiya İqtisadi Birliyinin tamhüquqlu üzvü olduqdan sonra bu ölkə vətəndaşları üçün Rusiyada əmək fəaliyyəti ilə məşğul olmaq asanlaşıb. Onlardan Rusiyada yaşamaq icazəsi və çalışmaq üçün əmək patenti almaq tələb olunmur. Nəticədə Ermənistandan Rusiyaya miqrant axını sürətlənib. Ermənistan sürətlə boşalır. Ölkə əhalisinin sayı getdikcə azalır. Bir sözlə, Avrasiya inteqrasiyasına qoşulmaq Ermənistanda demoqrafik vəziyyəti dəyişib və bundan sonra da dəyişəcək. Bu fakt isə Rusiyanın, o cümlədən Ermənistanın marağında deyil. Ermənistandakı sosial-iqtisadi problemlərin həllinə Avrasiya İqtisadi Birliyinə üzv ölkələr yardım edə bilər. Lakin bu ilk növbədə Ermənistan siyasi rəhbərliyindən, biznes elitasından asılıdır. Ermənistan rəhbərliyi anlamalıdır ki, onların yerinə bu problemləri heç kəs həll etməyəcək".

Ermənistanda demoqrafik vəziyyətin kritik həddə çatmasının tək Avrasiya İqtisadi Birliyinə üzv olması ilə izah edilməsi nə dərəcədə doğru sayıla bilər? Bəs təcavüzkar siyasət üzündən regional təcridə düşməsi azmı rol oynayıb? 

Konfliktoloq Aqşin Əliyev bu versiyanı inandırıcı saymır. O, qəzetimizə bildirdi ki, Moskvadakı ekspertlər bunu bilərəkdən ortaya atır: "Məqsəd Avrasiya Birliyinin nə dərəcədə cəzbedici olmasını dünyaya sırımaqdır. Yəni demək istəyirlər ki, insanlar öz vətənini qoyub Rusiyaya yaradılan şəraitə görə üz tutur. Məntiqi sual ortaya çıxır: yaxşı olsa, kim öz isti ocağını tərk edər ki? Ermənistan əhalisi ölkəni dözülməz sosial-iqtisadi şəraitə görə tərk edir. Bu şəraiti də Ermənistanın cinayətkar hərbi-siyasi rejimi yaradıb. Uzun illərdən bəri yürüdülən işğalçılq siyasəti təbii ehtiyatlarla zəngin olmayan Ermənistanı bütün sərfəli iqtisadi layihələrdən kənarda saxlayıb. Həmin rejimin yürütdüyü siyasət Ermənistanı tam izolyasiya şəraitinə sürükləyib. 

Bundan əlavə, ailələr övladlarını bilərəkdən ölkədən çıxarır ki, onlar gedib lazımsız müharibədə ölməsin. Cavanların da böyük əksəriyyəti bu səbəbdən ölkəni tərk edir. Bunun Avrasiya İttifaqına bir dəxli varmı? Təbii ki, yox. Statistikaya diqqət etsəniz görərsiniz ki, ölkəni tərk edən ermənilərin heç də böyük əksəriyyəti Rusiyaya üz tutmur. Başqa ölkələrə pənah aparanlar daha çoxdur. Deməli, Avrasiya İttifaqı versiyası özünü tam doğrultmur".sabahinfo.az