Tbilisidə beynəlxalq musiqi festivalı təxirə salınıb

Gürcüstanda din xadimləri ölkənin ən iri "Tbilisi JAM! Fest" beynəlxalq musiqi festivalına qarşı çıxıblar. sabahinfo.az-ın məlumatına görə, 4-5 iyun tarixlərində keçirilməsi nəzərdə tutulan festival çərçivəsində baş tutan səs-küylü şou yaxınlıqda yerləşən monastırın din xadimlərinin xoşuna gəlməyib.

"Rustavi 2" telekanalı xəbər verir ki, din xadimləri və bir sıra şəhər sakini festivalın keçirildiyi əraziyə gələrək, musiqinin yaxınlıqda yerləşən qəbirstanlıq və monastırda eşidildiyi ilə bağlı şikayət ediblər.  Bu zaman festival meydançasına elektrik enerjisinin verilməsi dayandırılıb. İştirakçıların fikrincə işığı din xadimləri söndürüblər. 

Festival təşkilatçılarının birinin yerli KİV-ə verdiyi məlumata görə, insidentlə bağlı rəsmi məlumat yaxın zamanda veriləcək. "Xoşagəlməz və utancverici hadisə baş verib. Bəli festival demək olar ki, din xadimləri tərəfindən təxirə salınıb" - deyə təşkilatçıların nümayəndəsi bildirib. 

Şahidlərin sözlərinə görə, əraziyə gələn polislər iştirakçıları festival ərazisini tərk etməyə vadar edib.  Həmin zaman çıxış edən "Jinjer" qrupunun üzvləri öz rəsmi Facebook səhifələrində yazıblar ki, "sivil görsənən ölkədə dinin qanundan daha üstün olduğundan" məyyus olublar. Qrup həmçinin yaxın zamanda festivalın keçirilməsi üçün uyğun bir yerin tapılacağına və onların gercüstanlı tamaşaçılar qarşısında çıxış edə biləcəyinə ümid etdiyini bildirib. 

"Çox təəssüf ki, bu gün festivalda belə bir şey baş verdi. Çox təəssüf ki, ölkə bu vəziyyətdədir. Yaxın zamanda biz insidentlə bağlı rəsmi məlumat yayacağıq. Səbr və dəstəyinizə görə təşəkkür edirik " - deyə festival administrasiyası məlumat yayıb.

Tbilisidə keçirilən festivalda İsveç, İsrail, Ukrayna, Azərbaycan və Ermənistandan olan məşhur rok-qruplar çıxış etməli idi.