"Günəşli” yatağındakı yanğında itkin düşmüş neftçilərimiz üçün Allahdan bir möcüzə gözləyirik və dualar edirik.

 

Sabahinfo.az xəbər verir ki, bu barədə millət vəkili Qənirə Paşayeva Feysbuk hesabında "Günəşli” neft yatağında baş verən faciə ilə bağlı yazıb.

 

"İnsan bəzən bir möcüzə gözləyir. "Günəşli” yatağındakı yanğında itkin düşmüş neftçilərimiz üçün də Allahdan bir möcüzə gözləyirik və dualar edirik. Ümid ən sonda ölur. Allah itkin düşən insanlarımızın əzizlərinə səbir versin. Onların üzüntüsü hamımızın acısıdır. Allahdan millətimizin bir daha belə acılar yaşamamasını diləyirik”, - deyə Q. Paşayeva qeyd edib.

 

Millət vəkili Əli Məsimli də baş vermiş faciə ilə əlaqədar başsağlığı verib:

 

"Azərbaycan Respublikası Dövlət Neft Şirkətinin "Günəşli” yatağının 10 saylı stasionar dərin dəniz özülündə baş vermiş dəhşətli qəza nəticəsində insan tələfatı səbəbindən üzüldüyümü bildirir, həlak olanlara Tanrıdan rəhmət diləyir, onların əzizlərinə, yaxınlarına dərin hüznlə baş sağlığı verirəm. Yaralılara Allahdan şəfa diləyirəm”.

 

Qeyd edək ki, dekabrın 4-də Dövlət Neft Şirkətinin (SOCAR) "Günəşli” yatağındakı 10 saylı dərin dəniz özülündə baş vermiş qəza nəticəsində bir nəfər həlak olub, 33 nəfər xilas edilib. İtkin düşən 29 nəfərin axtarışı davam edir.