26 İyun Azərbaycan Silahlı Qüvvələri Günü hər il ölkəmizdə böyük təntənə ilə qeyd olunur. Artıq 3 ildir ki, Ordumuzun yaranması tarixi fərqli bir obrazda qeyd edilir. Çünki Ordumuz artıq qalib ordudur. Azərbaycan Silahlı Qüvvələri öz üzərinə düşən tarixi missiyanı 2020-ci ilin 27-i sentyabrından başlayaraq 44 günlük Vətən Müharibəsində şərəflə icra etdi. Azərbaycan xalqı məhz cəsur əsgər və zabitlərimizin başda Ali Baş Komandan İlham Əliyevin qətiyyəti sayəsində bu gün qalib və başı ucadır. Bu mənada Ordumuz xalqımızın güvənc yeri hesab edilir.
Bunu Milli Məclisin deputatı Aqil Məmmədov deyib.
O qeyd edib ki, Azərbaycan Ordusu müasir standartlara cavab verməsi, hərbi-texniki və döyüş hazırlığının yüksək səviyyədə olması qazanılan hərbi uğurlarla təsdiqlənir: “Bu gün dövlətimizin prioritet məsələ kimi qəbul etdiyi prinsiplərdən biri də Ordunun kadr potensialının artırılması, şəxsi heyətin bilik və bacarığının, döyüş ruhunun yüksəldilməsi, hərbiçilərin sosial problemlərinin həllidir. Müzəffər Ali Baş Komandan İlham Əliyev tərəfindən Ulu Öndər Heydər Əliyevin siyasi kursunun layiqli davamçısı kimi, bu istiqamətdə uğurlu siyasət həyata keçirilir və Azərbaycan Ordusunun döyüş qabiliyyəti günü-gündən artırılır”.
Deputat bildirib ki, Qafqazın güclü ordusu olan Azərbaycan Silahlı Qüvvələri hər zaman sülhün və təhlükəsizliyin qarantı olub: “1990-cı illərin ortalarından başlayaraq Azərbaycanın NATO ilə sıx və səmərəli əməkdaşlığı da məhz bu qəbildəndir. Sözsüz ki, bu amillər Ordu quruculuğu prosesinin təkmilləşdirilməsinə, Silahlı Qüvvələrimizin modernləşdirilməsinə, müasir standartlara uyğunlaşdırılmasına başlıca zəmin yaradır. Ulu Öndərin uzaqgörən siyasəti nəticəsində 1994-cü ilin əvvəllərində Azərbaycan NATO-nun “Sülh naminə tərəfdaşlıq” proqramına qoşulub. Eyni zamanda Azərbaycan Ordusu 1996-cı ildə “Planlaşdırma və analiz prosesi” proqramına, 2001-ci ildə isə “Fərdi Tərəfdaşlıq üzrə Əməliyyat Planı”na qoşulub. Bunun nəticəsi olaraq il ərzində 2 mindən çox Azərbaycan hərbçisi NATO-nun və digər ikitərəfli əməkdaşlıq proqramlarının platformalarında iştirak edir. Bu proqramlara qatılaraq Silahlı Qüvvələrimiz ən son hərbi yeniliklərə yiyələnir. Artıq beynəlxalq sülhməramlı qüvvələrin tərkibində Kosovoda, Əfqanıstanda və İraqda böyük təcrübə qazanan və öz standartlarını NATO standartlarına uyğunlaşdıran Azərbaycan Ordusu modern ordu kimi nüfuzunu və gücünü daha da artırmaqdadır”.
Millət vəkili hesab edir ki, Ordumuzun Aprel döyüşlərində qazandığı parlaq qələbə, 2018-ci ilin uğurlu Günnüt əməliyyatı Silahlı Qüvvələrimizin işğal faktına gec-tez son qoyacağı mesajı idi: “Məhz Müzəffər Ali Baş Komandan İlham Əliyevin rəhbərliyi ilə 2020-ci il 27-i sentyabrında əks hücum əməliyyatı ilə başlayan 44 günlük Vətən müharibəsində düşmən üzərində tarixi qələbə qazanıldı. Qəhrəman hərbçilərimizin şücaəti, rəşadəti hesabına, şəhidlərimizin qanı-canı bahasına bütün dünya Azərbaycanın şanlı qələbənin şahidlik etdi. Bununla da Azərbaycan dünya birliyi tərəfindəın tanınan, qəbul edilən ərazi bütövlüyünü təmin etdi”.
Aqil Məmmədov vurğulayıb ki, bu tarixi Zəfərin qazanılması qəhrəman hərbiçilərimiz, şəhidlərimiz, qazilərimiz sayəsində mümkün oldu: “Sözsüz ki, dövlətimiz tərəfindən hərbçilərimiz orden və medallarla təltif edilir, şəhid ailələri və qazilər yüksək qayğı ilə əhatə olunur. Postmüharibə dövründə Azərbaycan Ordusu öz inkişafının yeni mərhələsini yaşayır. Dünyanın 50 ən güclü ordusu sırasında yer alan Azərbaycan Silahlı Qüvvələrinin yeni dövrün çağırışları əsasında komplektləşdirilməsinə diqqət yetirilir. İyunun 23-də Ali Baş Komandan İlham Əliyev Müdafiə Nazirliyinin komando hərbi hissələrinin birində yaradılan şəraitlə tanış olub, həmin hərbi hissəyə Döyüş bayrağının təqdim edilməsi mərasimində çıxışında da bir sıra vacib mesajlar verdi. Dövlətimizin başçısı II Qarabağ müharibəsindən sonra Ordu quruculuğu prosesinin daha geniş vüsət aldığını vurğulayıb. Bildirib ki, müharibədən sonra Ordu quruculuğu üçün əlavə addımlar atılır və buna böyük ehtiyac var. Ölkəmizin başçısı həmçinin Azərbaycanın öz gücünü artırması ilə yanaşı ədalətli sülh şərtlərini də açıqlayıb. Azərbaycanın şərtlərindən birinin Zəngəzur dəhlizinin açılması olduğunu söyləyən Ali Baş Komandan Ermənistanın 2020-ci il noyabrın 10-da imzaladığı kapitulyasiya aktı ilə bu məsələdə öz üzərinə öhdəlik götürdüyünü qeyd edib. Sözsüz ki, Ali Baş Komandan tərəfindən bu qarşı tərəf verilən növbəti bir mesaj idi. Amma Azərbaycanın bu şərtləri icra edilməsə güclü Silahlı Qüvvələrimiz növbəti dəfə üzərinə düşən missiyanı layiqincə yerinə yetirməyə hazırdır”.
