Bu səfərin Azərbaycan və Almaniya münasibətlərinin inkişafına töhfə verəcəyinə inanırıq. Səfər zamanı aparılan müzakirələrdə iqtisadi sahədə ticarət dövriyyəsinin üç dəfə artması və bərpa olunan enerji sahəsində əməkdaşlıq imkanları diqqət mərkəzində olub.

Azərbaycanın ev sahibliyi etdiyi COP29 çərçivəsində Almaniya ilə sıx təmaslar davam etdirilib. Konfransdan öncə “kiçik COP” adlanan Almaniyanın Bon şəhərində Konvensiyaya tərəf ölkələrin yardımçı qurumlarının (subsidiary body 60) 60-cı sessiyası keçirilmiş, Azərbaycan nümayəndə heyəti konfransda geniş tərkibdə iştirak etmişdi.

Almaniya Prezidentinin Ermənistana səfəri zamanı baş verən xoşagəlməz təxribat fonunda Prezident İlham Əliyevin Almaniyalı həmkarı ilə birgə jurnalistlərin suallarını cavablandırarkən Ermənistanın işğalçılıq siyasətindən danışması həm də dövlətimizin bu məsələdə prinsipallığının göstəricisidir. Prezident Azərbaycanın 30 il ərzində erməni işğalından zərər çəkməsini qeyd edərək, işğal nəticəsində 1 milyona yaxın insanın məcburi köçkün vəziyyətinə düşdüyünü bildirdi. Azərbaycan Ermənistanın təcavüzündən və işğalından əziyyət çəkib. Bu dövrdə ölkəmiz həm humanitar, həm iqtisadi, həm də ekoloji baxımdan ciddi zərərlərə məruz qalıb. BMT Təhlükəsizlik Şurası 1993-cü ildə 4 qətnamə (822, 853, 874, 884) qəbul edərək Ermənistan qoşunlarının Azərbaycan torpaqlarından dərhal çıxmasını tələb etdi. Buna baxmayaraq, Ermənistan qətnamələri icra etmədi, işğal rejimini davam etdirdi. ATƏT-in Minsk Qrupu vasitəsilə danışıqlar aparılsa da, Ermənistan illərlə sülh prosesini pozaraq status-kvonu qorumağa çalışdı. Beynəlxalq təşkilatlar bu məsələyə ciddi müdaxilə etməsə də, Azərbaycan münaqişəni siyasi və hərbi yollarla həll edib.

Bu tarixi qələbə sülh prosesinə yol açıb və hazırda iki ölkə arasında sülh sazişi istiqamətində müsbət irəliləyişlər var. Dövlət başçısı görüşdə Ermənistanla sülhün şərtlərini də açıqladı. Ermənistan Konstitusiyasına dəyişiklik edilməsi vacibdir, çünki bu sənəddə Azərbaycana qarşı ərazi iddiaları mövcuddur. Eyni dərəcədə labüddür ki, Ermənistan ATƏT-in fəaliyyətsiz Minsk qrupunun ləğvi istiqamətində əməli addımlar atsın. Ermənistanın bu öhdəlikləri bir-bir yerinə yetirməsi bizi sülhə yaxınlaşdıracaq.

Pərvanə Vəliyeva 

Milli Məclisin deputatı