Bir neçə gün əvvəl hava şəraitinin aramsız yağışlı keçməsi nəticəsində Abşeron rayonunun Xırdalan şəhərinin, o cümlədən kənd və qəsəbələrinin bəzi ərazilərində subasma halları müşahidə edilib.
Abşeron Rayon İcra Hakimiyyətindən Sabahinfo.az-a daxil olan məlumata görə, ötən müddət ərzində bir çox yerlərdə yığılan su kütləsi təmizlənsə də, bəzi ərazilərdə yağışın fəsadlarının aradan qaldırılması işləri davam etdirilməkdədir.
Belə ki, yüklənmə nəticəsində qəza baş vermiş nasosxanaların fəaliyyəti, eləcə də elektrik enerjisinin kəsintisiz verilməsi bərpa olunub. Rayon ərazisində yerləşən göllərin səviyyəsi əhəmiyyətli dərəcədə qalxdığından və vətəndaşların fərdi yaşayış evlərinin daha acınacaqlı vəziyyətə düşməsinin qarşısının alınması məqsədi ilə göl və ətraf ərazilər xüsusi nəzarətə götürülmüş, nasosxanalar əlavə texniki vasitələrlə gücləndirilib.
Abşeron Rayon İcra Hakimiyyəti, yerli bələdiyylər, FHN və ADSEA tərəfindən ərazilərə cəlb olunmuş xüsusi texnikalar və nasoslar vasitəsi ilə küçə, həyətyanı sahələrdə və zirzəmilərdə yığılmış yağıntı sularının fasiləsiz şəkildə kənarlaşdırılması həyata keçirilir. Yağıntı miqdarı həddindən artıq çox olduğundan problemli ərazilər prioritet bölgü əsasında mərhələli şəkildə fasiləsiz həyata keçirlməkdədir. O cümlədən Məmmədli kəndində əlavə texnika cəlb olunmaqla 6 ünvanda nasoslar quraşdırılaraq yığılmış yağış sularının kənarlaşdırılması işləri daha da surətləndirilib.
Mövcud vəziyyətlə bağlı sakinlər tərəfindən rayon icra hakimiyyətinə müraciətlər əsasında, xüsusilə Xırdalan şəhəri, Masazır, Məmmədli, Qobu və Hökməli kimi yaşayış məntəqlərində təxliyə işləri həyata keçirilib. Su basmış mənzillərdə yaşayan sakinlərin müvəqqəti olaraq hotellərə və kirayə evlərə yerləşdirilməsi təmin edilib. O cümlədən ciddi zərər görmüş və qəzalı vəziyyətə düşmüş bir neçə fərdi yaşayış evinin sakinləri təxliyyə edilib, bərpasına köməklik göstərilməsi nəzərdə tutulub.
Bütün bu işlərlə yanaşı, yağışlardan sonra çirklənməyə məruz qalan küçə və prospektlərdə təmizlik işləri həyata keçirilir.
