Azərbaycan gəncləri milli maraqların daim keşiyində dayanmalı, vətəndaşlığın əxlaqi yükünü daim çiyinlərində hiss etməli, dövlətçilik ideyalarını üstün tutmalıdır
Sağlam gənclik hər bir dövlətin inkişafı, hər bir millətin yaşaması üçün əsasdır. Çünki müstəqilliyin, dövlətçiliyin daha da möhkəmləndirilməsinin, millətin gələcək taleyinin həll olunmasının etibarlı təminatı intellektual səviyyəli, potensiallı kadrların yetişdirilməsindən, onların aparıcı qüvvəyə çevrilməsindən çox asılıdır. Məhz buna görə də gənc nəslin düzgün yetişdirilməsi dövlət siyasətinin prioritet istiqamətlərindən biridir. Azərbaycanı gənclər ölkəsi, gəncləri isə Azərbaycanın gələcəyi adlandıran Ulu Öndər gənc nəslə qayğını əsirgəməyib. Ümummilli Lider Heydər Əliyevin 1993-cü ildə hakimiyyətə qayıdışı ilə gənc nəslə diqqətin göstərilməsi dövlət siyasətinin prioritet istiqamətlərindən birinə çevrildi. Ulu Öndər tərəfindən 2 fevral 1997-ci il tarixində imzalanmış Sərəncama əsasən fevralın 2-si Azərbaycan Gəncləri Günü elan edilib. Həmin vaxtdan etibarən bu gün MDB məkanında və Şərqi Avropa ölkələri arasında ilk dəfə olaraq Azərbaycanda Gənclər Günü təntənəli şəkildə qeyd edilməyə başlanıb. Bu günədək ölkəmizdə gənclərlə iş sahəsində görülən tədbirlərin, Azərbaycan gəncliyinin inkişafına verilmiş təkanın nəticəsidir ki, cənclər cəmiyyətdə özlərini təsdiq edə bilir və bütün sahələrdə özlərini doğruldurlar. Əsası Ümummilli Lider Heydər Əliyev tərəfindən qoyulmuş dövlət gənclər siyasəti, Prezident İlham Əliyev tərəfindən uğurla davam etdirilir. Ölkə başıçısının “Bütövlükdə gələcəkdə Azərbaycanı idarə edəcək insanlar bugünkü gənclərdir” fikri dövlətin gənclərə olan inam və etimadının göstəricisidir.
Bu gün Azərbaycan gənclərinin fəaliyyəti hər bir sahədə diqqəti çəkir. Azərbaycan gəncləri öz intellektini, potensialını üzə çıxararaq vətəndaş cəmiyyəti işində aktivlik göstərirlər. Gənclərin dövlətin və cəmiyyətin inkişafın üçün bu addımları müsbət amildir. Bütün bunlar Azərbaycan gənclərinin mənəvi inkişafının hansı səviyyədə olduğunu bir daha nümayiş etdirir. Gənclər siyasəti ölkədə həyata keçirilən dövlət siyasətinin mühüm tərkib hissəsidir. Prezident İlham Əliyevin gənclərin potensialının gerçəkləşməsinə, onların vətənpərvər, savadlı kadr kimi yetişməsinə, gənc ailələrin sosial təminatına yönələn tədbirləri dövlətin uzaqgörən siyasətinin göstəricisi kimi qiymətləndirilməlidir. Mütəmadi olaraq təkmilləşdirilən gənclər siyasəti gənc nəslin ictimai-siyasi həyatdakı rolunun artmasına, ölkənin aparıcı qüvvəsinə çevrilməsinə, bütövlükdə, kreativ gəncliyin formalaşmasına şərait yaradıb. Məhz dövlətin gənclərə dəstək və diqqət göstərməsinin nəticəsində Azərbaycan gəncliyində özünə, öz gücünə, istedadına inam hissi artıb. İndiki dövrümüzdə gənclərin arzularının reallaşması üçün daha əlverişli şərait yaranıb. Bütün bunlara görə indiki gənclik daha şanslıdır. Çünki onların arzuları sadəcə arzu olaraq qalmır, arzu olmaqdan çıxaraq nəticə ilə əvəzlənir. Prezident İlham Əliyev özü də dəfələrlə bildirib ki, neft kapitalını insan kapitalına çevirmək lazımdır. Bu fikirlər özünü dövlətin gənclər siyasətində də göstərir. Odur ki, gənclərin bu siyasətə dəstək verməsi üçün intellektual gənclərin bir araya gəlməsi və onların fikir mübadiləsi nəticəsində ortaq yeni ideyalar tapması vacib amildir. Prezident İlham Əliyev Azərbaycanın bugünkü inkişafında gənclərin rolunu yüksək qiymətləndirərək demişdir: “Mən gənclərin rolunu həmişə çox yüksək qiymətləndirmişəm. Bu gün də Azərbaycan gəncləri ölkəmizin uğurlu inkişafında öz fəal rolunu oynayırlar. Deyə bilərəm ki, gənclər cəmiyyətimizin ən fəal təbəqəsidir və bu gün gənclərə geniş imkanlar yaradılır. Gənclər önəmli vəzifələrə təyin olunur: nazir, icra başçısı vəzifələrinə”.
Gənclərimiz könüllülər hərəkatının aparıcı gücüdür. Konüllülük prinsipi gənclərə sosial məsuliyyət anlayışı aşılayır, onların gələcək fəaliyyətlərində lazımi bilik və bacarıqların əldə olunmasında əvəzsiz imkanlar yaradır . Beynəlxalq təcrübəyə əsaslansaq görərik ki, gənclər öz metodik bilik və bacarıqlarını könüllülük proqramlarında praktik inkişaf etdirir və yeni təcrübə imkanları əldə edirlər. Hal-hazırda ölkəmizdə bir neçə maraqlı könüllülük proqramları həyata keçirilir. Xüsusi ilə Bakıda keçirilmiş Birinci Avropa Oyunları, İslam Həmrəyliyi Oyunları və digər beynəlxaq tədbirlərlə əlaqədar aparılan könüllülük proqramları gənclər üçün yeni təcrübə imkanları əldə etmələrinə şərait yaradıb. Bununla yanaşı, gənclərin sosial aktivliyinin artırılması istiqamətində və iş təcrübələrini əldə etmələrində ASAN Könüllüləri Gənclər Təşkilatının fəaliyyəti əvəzsizdir. Prezident İlham Əliyev 2019-cu il dekabrın 30-da Azərbaycan Respublikasında 2020-ci ilin “Könüllülər ili” elan edilməsi haqqında Sərəncam imzalayıb. Könüllülər hərəkatının cəmiyyətin inkişafında xüsusi əhəmiyyəti var. Bu, cəmiyyətdə xeyirxahlıq, yeni davranış qaydalarını təbliğ edir.
Son dövrlərdə erməni lobbisi tərəfindən ölkəmizə qarşı düşünülmüş qərəzli kampaniyalar aparılır. Azərbaycan gənclərinin informasiya müharibəsində fəallığı birbaşa ölkəmizin beynəlxalq nüfuzuna xidmət edir. Bu nüfuzun qorunması, yüksəlişi naminə ölkədəki və xaricdəki gənclər də bütün səy və bacarıqları, şəxsi təşəbbüsləri ilə həmrəylik nümayiş etdirməlidirlər. Həmçinin gənclərimiz xaricdə iştirak etdikləri müxtəlif tədbirlərdə Azərbaycanın dünyada tanıdılması, erməni yalanlarının ifşa olunması istiqamətində əllərindən gələni etməlidirlər. Gənclərimzin bu fəallığı, həm ölkəmizin tanıdılmasına, həm də diasporumuzun inkişafına təkan verəcək. Azərbaycan gəncləri milli maraqların daim keşiyində dayanmalı, vətəndaşlığın əxlaqi yükünü daim çiyinlərində hiss etməli, dövlətçilik ideyalarını üstün tutmalıdır. Bununla gənclərimiz öz vətənpərvərliklərini göstəmiş olarlar. Necə 44 günlük Vətən müharibəsində biz bunu gördük...
Rüstəmova Aybəniz Vilayət qızı, Avrasiya Universitetinin Humanitar fənlər və regionşünaslıq kafedrasının müdiri, tarix üzrə fəlsəfə doktoru, dosent
