SOCAR-ın 2025-ci il üzrə həyata keçirilmiş “Gənc İstedadlar Proqramı”nı uğurla başa vuran 11 nəfər məzunla “Azəriqaz” İB-nin baş direktoru Azər Məmmədovun görüşü baş tutub.

“Qafqazinfo” xəbər verir ki, ilk olaraq təcrübəçilərin mentorları olan baş direktorun birinci müavini (Əməliyyat üzrə) Nail Abdullayev, Biznes proseslərin Təhlili və Analitikası Departamentinin rəisi Zabil İbayev və Maliyyə Planlaması və Təhlili Departamentinin rəisi Ruslan Xankişiyev proqram haqqında Azər Məmmədova ətraflı məlumat veriblər.

5 ay davam edən layihə çərçivəsində təçrübəçilərin gördükləri iş, yerinə yetirdikləri tapşırıqlar və üzərində çalışdıqları mövzulardan bəhs edilib. Birliyin baş direktoru onu maraqlandıran suallara cavab tapdıqdan sonra proqramı başa vuran 11 təcrübəçinin hər biri ilə ayrı-ayrılıqda yaxından tanış olaraq onlara gələcəkdə işlə təminatlarında uğurlar arzulayıb.

Qeyd edək ki, SOCAR-ın “Gənc İstedadlar Proqramı” çərçivəsində cari il üçün “Azəriqaz” İB üzrə ümumilikdə 11 kvota təqdim edilib. Mart ayından start götürən proqram təlimlər və istehsalat təcrübəsindən ibarət olmaqla, ümumilikdə 5 ay davam edib.