Bu gün Bakı Ağır Cinayətlər Məhkəməsində Suriyada Bəşər
Əsədə qarşı olan qanunsuz silahlı birləşmələrin tərkibində döyüşməkdə
təqsirləndirilən 6 nəfər - Sənan Baxışov, Ruslan Cəfərov, Eldost
Quliyev, Məmmədşah Məmmədəliyev, Əhməd Həsənov və Maarif Mərdanovun
cinayət işi üzrə növbəti məhkəmə prosesi keçirilib.
Virtualaz.org saytının məhkəmə prosesində iştirak edən müxbirinin verdiyi məlumata görə, prosesə hakim Mirzə Xankişiyev sədrlik edib.
Prosesdə təqsirləndirilən Sənan Baxışova sərbəst ifadə vermək
təklif olundu. O, ifadə verməkdən imtina etdi və yalnız şəriət qanunları
üzrə mühakimə olunmaq istədiyini dedi: "Yüz dəfə aparıb-gətirsələr də
eyni şey olacaq. Biz bu qanunlarla mühakimə olunmaq istəmirik. Allahın
hökmlərindən başqa bütün hökmləri inkar edirik”.
"Cəbhətül-Nüsra” və "Abu Ənsar”ın terror təşkilatı olmasından xəbərim olmayıb”
Hakim təqsirləndirilən şəxsə Allahın hökmünü, iradəsini qəbul
etməyən insan olmadığını bildirdi: "Bizi maraqlandıran odur ki, sizi
niyə tutublar”.
Təqsirləndirilən şəxs isə məhkəməni inkar etdiyini, danışmaq istəmədiyini dedi.
Bundan sonra təqsirləndirilən S.Baxışovun istintaqa verdiyi ifadəsi elan olundu.
İbtidai istintaq zamanı S.Baxışov ifadəsində ona elan olunmuş
ittihamlarla özünü qismən təqsirli bildiyini, ibadətlə məşğul olduğunu,
əslən türk olan Abu Hanzalanın dərslərinin videoyazılarını internet
vasitəsilə dinlədikdən sonra Suriya prezidenti Bəşər Əsədin müsəlmanlara
qarşı törətdiyi soyqırımı anladığını, buna görə də cihada getmək
qərarına gəldiyini göstərib: "Bu barədə Ağsu rayonundan olan Zamiq
Vəliyevə danışdım. Mənimlə eyni əqidədə olan Zamiq Həsən adlı şəxsin
nömrəsini mənə verdi. 26 mart, 2013-cü ildə Türkiyəyə getdim, Həsəni
tapdım. Həsən məni gizli yollarla Suriya ərazisinə keçirdi.
Orada dini adı "Abu Hafs” olan Aqil Hacıyevin rəhbərlik etdiyi
"Sumqayıt camaatı”na qoşuldum, Abu Hafsaya biət etdim. "Sumqayıt Abu
Hafs camaatı” "ən-Nüsra Cəbhəsi” hərbi qruplaşmasının tərkibində idi.
Orada olan müddətdə əslən ərəb olan Abu Yusif mənə və "Sumqayıt
camaatı”na hərbi təlimlər keçir, odlu silahdan istifadə etmək
qaydalarını, döyüş taktikasını öyrədirdi.
Təxminən 15 gündən sonra Azərbaycandan olan, dini adları Mustafa və
Abu Usama olan şəxslərlə "Sumqayıt Abu Hafsın camaatı”ndan ayrılaq
Sarma vilayətində olan "Ənsar camaatı”na qoşulduq. Eldost Quliyevlə
orada tanış olmuşam. Birlikdə hərbi və fiziki təlim keçmişik.
11 ay orada qaldıqdan sonra "Azad Suriya Ordusu” tərəfindən əsir
götürüldük. Orada Muaz ləqəbli Maarif Mərdanovu da gördüm. Əsirlikdən
azad olunandan sonra Azərbaycana qayıtdım. "Cəbhətül-Nüsra” və "Abu
Ənsar”ın terror təşkilatı kimi tanınmasından məlumatım olmayıb, heç bir
terrorçuluq əməli törətməmişəm, belə bir məqsədim də olmayıb”.
"Sizin ağlınızı şikəst ediblər”
Bundan sonra təqsirləndirilən Ruslan Cəfərova ifadə vermək təklif
olundu. Təqsirləndirilən şəxs ifadə verməkdən imtina etdi və Allahın
buyurduğu qanunlardan başqa heç bir dünyəvi qanunu qəbul etmədiyini
bildirdi.
Hakim üzünü təqsirləndirilən şəxslərə tutaraq dedi: "Mənə çox
maraqlıdır, aranızda dini fəlsəfəni dərindən bilən, Quran mahiyyətini
dərk edən varmı, onunla rahat danışaq”.
R.Cəfərov hakimə cavabında indiki insanların Allahın yer üzünə
göndərdiyi Müqəddəs Kitaba münasibətlərinin pis olduğunu dedi: "Allah
Məhəmməd peyğəmbər vasitəsilə Quranı yolladı ki, oxuyun. Amma indi
oxumaq əvəzinə aparıb şkafa qoyurlar. Quran şkaf üçün göndərilməyib,
oxumaq üçün göndərilib, oxuyub, Allahın buyurduğu kimi ömür sürməyə
göndərilib. Danışmaq istəmirəm, amma ürəyim partlayır. Özümə söz
vermişəm ki, cinayət dediyiniz şeylə bağlı bir kəlmə belə
danışmayacağam”.
Hakim deyilən sözlərə qısa arayış verdi: "Sizin ağlınızı şikəst ediblər. Sizin nə işiniz var idi Suriyada?”
"Orada dini müharibə getmədiyini anladım”
Sonra R.Cəfərovun istintaqa verdiyi ifadəsi elan olundu.
İbtidai istintaq zamanı ona elan olunmuş ittihamla özünü qismən
təqsirli bilib, 2012-ci ildən ibadətlə məşğul olduğunu, dini adının
"Abdul Rəşid” olduğunu göstərib: "Suriyada vətəndaş müharibəsi olduğunu
internet vasitəsilə izləyirdim. Cihada qoşulmaq üçün 25 sentyabr,
2012-ci ildə tanışım Elşad İslamovla birlikdə İstanbula, oradan isə
Suriyanın Artma şəhərinə getdik. Bəşər Əsədə qarşı döyüşən Ömər
Şişaninin (söhbət İŞİD-in ən güclü hərbi rəhbərlərindən biri, əslən
Gürcüstanın Pankisi dərəsindən olan və "Ömər Şişani” kimi tanınan Timur
Batiraşvilidən gedir-red.) camaatına qoşulduq.
Mənə avtomat silah verdilər. Suriyanın Qah şəhərində hərbi təlimlər
keçirdik. Şeyx Süleyman şəhəri və digər bölgələr uğrunda döyüşlərdə
iştirak etmişəm. Üç ay orada qaldıqdan sonra əslində Suriyada dini
müharibə getmədiyini, fitnə baş verdiyini anladım. Silahımı təhvil verib
dəstədən ayrıldım. Suriyanın Türkiyə ilə həmsərhəd ərazilərindəki boş
evlərdə tək yaşamağa və türklərin maliyyə dəstəyi ilə dolanmağa
başladım.
2 aprel, 2014-cü ildə "Azad Suriya Ordusu”nun üzvləri onlarla
birlikdə Bəşər Əsədə qarşı döyüşməyi təklif etdilər. Razılaşmadım və
Türkiyəyə keçib Azərbaycana qayıtdım.
Mənim terrorçuluq etmək kimi bir niyyətim olmayıb. Yalnız cihad
etmək üçün oraya getmişdim. Aqil Hcıyevin rəhbərlik etdiyi "Sumqayıt Abu
Hafs camaatı”, "Ənsar camaatı”, "Çeçen Seyfullahın camaatı” da
"Ən-Nüsra Cəbhəsi”nin vahid komandanlığı altında fəaliyyət göstərirdi”.
Digər təqsirləndirilən Məmmədşah Məmmədəliyevə ifadə vermək təklif
olundu. O, ifadəsində Suriyaya getdiyini və 3 övladının olduğunu dedi:
"Allah Quranı bizə nazil edib ki, onunla aramızda hökm buyursun. Amma
siz bizi Allahın göndərdiyi kitabla deyil, Roma papasının verdiyi
konstitusiya ilə mühakimə edirsiniz. Burda nə danışaq, nə deyək?
Üç övladım var. Allahın əmri ilə Suriyaya getdim. Məqsədim
müharibədən əziyyət çəkən müsəlman qardaşlarıma kömək etmək olub.
"Cəbhətül Nüsra” adlı dini qrupda olmuşam. Orada yerli camaat da çox
idi, azərbaycanlılar da. Döyüşdə yaralanan qardaşlara kömək etmişəm. Heç
bir silahlı təlimdə iştirak etməmişəm. Çünki buna ehtiyacım olmayıb.
Hərbi xidməti cəbhə bölgəsində keçmişəm. Silahdan istifadə etməyi
bacarıram. Silahım olub, yerli camaatdan almışdım. Əməlimdən peşman
deyiləm”.
Hakim M.Məmmədəliyevin ifadəsindən sonra qısa arayış verdi: "Sən
burda olmasaydın, mən də bu zalda hakim olmasaydım, sənə dindən elə
danışardım ki, özün məəttəl qalardın. Dörd-beş dini kitab oxuyub özünü
savadlı bilirsən”.
M.Məmmədəliyev isə cihadın şərtləri olduğunu, şəriətə uyğun olaraq Suriyanı seçdiyini dedi.
"Suriyadakı cihad cihad deyildi”
Təqsirləndirilən şəxslərdən Əhməd Həsənov və Maarif Mərdanov da ifadə verməkdən imtina etdilər.
Ə.Həsənovun ibtidai istintaqa verdiyi ifadəsi elan olundu. O,
ifadəsində özünü qismən təqsirli bilib, Suriyada baş verən
qarışılıqlarla əlaqədar ora getmək fikrinə düşüb, məqsədinin dini
qaydalara uyğun yaşamaq və cihada qoşulmaq olduğunu göstərib: "2013-cü
ilin avqust ayında Eldost Quliyev və Aqil Hümmətovla Türkiyəyə getdik.
Həsən adlı şəxsin vasitəsilə Suriyaya keçdik. Eldost və Aqil "Sumqayıt
camaatı”na qoşuldular. Mən isə "Ahraru Şam camaat”ına qatıldım.
"Ahraru Şam camaatı”nın əmiri milliyyətcə ərəb olan Abu Yəhya idi.
Bizə hərbi təlimlər keçirilirdi, döyüş taktikası öyrədilirdi. Mən
terrorçuluqla məşğul olmamışam və "Ahraru Şam camaatı”nın terror
təşkilatı kimi tanınmasından məlumatım olmayıb.
2014-cü ilin mart ayında "Azad Suriya Ordusu” tərəfindən əsir
götürülmüşəm. Onlarla birlikdə döyüşmək istəmədim. Suriyadakı cihadın
cihad olmadığını anlayaraq geri qayıtdım”.
Ə.Həsənov qısa çıxışında verilən ittihamların əsassız olduğunu
bildirdi: "Cihad - küfrlə mübarizə aparıb haqqa yiyələnmək deməkdir.
Burada danışmağın heç bir əhəmiyyəti yoxdur. Özləri düzüb qoşublar.
İbtidai istintaqa verdiyim ifadəni elan edirsiniz, amma orada bir dənə
düzgün məqam yoxdur. Özlərinə nə sərf edirsə, onu da yazıblar. Hökm
Allahındır. Başqa sözə ehtiyac yoxdur”.
Təqsirləndirilən Maarif Mərdanov ibtidai istintaqa verdiyi
ifadəsində cihada qoşulmaq üçün Suriyaya getdiyini, Suriya ərazisinə
Həsən adlı şəxsin vasitəsilə qaçaq yolla keçdiyini göstərib: "Aqil
Hacıyevin rəhbərlik etdiyi "Sumqayıt camaatı”na qoşuldum. Orada dini
təhsil alırdım, hərbi təlimlər keçirdilər. Suriyada olduğum müddətdə heç
bir döyüşdə iştirak etməmişəm. 2014-cü ilin aprel ayında Azərbaycana
qayıtmışam”.
Məhkəmə prosesi mayın 5-də davam edəcək.
İstintaqla müəyyən edilib ki, təqsirləndirilən şəxslər BMT
tərəfindən terror təşkilatı kimi tanınan "ən-Nüsra Cəbhəsi” adlı
cinayətkar birliyin tərkibinə daxil olan Suriya Ərəb Respublakası
ərazisində həmin dövlətin və Azərbaycan Respublikasının qanunvericiliyi
ilə nəzərdə tutulmayan silahlı birləşmələrin fəaliyyətində dini
düşmənçilik zəminində iştirak ediblər.
Təqsirləndirilən şəxslərə qarşı Cinayət Məcəlləsinin 228.1, 12.1,
279.1-ci, 123, 214.2 və 28-ci maddələri ilə ittiham irəli sürülüb.