Sosial siyasətin uğurlu həyata keçirilməsi təkcə dövlətin fəaliyyəti ilə məhdudlaşmır. Burada ictimai təşəbbüslərin rolu da son dərəcə mühümdür”. Bu fikirləri saytımıza “Dayaq” Sosial Maarifləndirmə İB-inin sədri Hicran Əliməmmədova bildirib.
Hicran Əliməmmədova əlavə edib ki, “ictimai təşəbbüslər” dedikdə vətəndaşların, qeyri-hökumət təşkilatlarının, ictimai birliklərin və könüllü qrupların sosial problemlərin həlli üçün irəli sürdüyü ideyalar və həyata keçirdiyi layihələr nəzərdə tutulur: “Bu təşəbbüslər sosial siyasətin formalaşması və icrasında birbaşa iştirak etməyə imkan verir, eyni zamanda cəmiyyətin sosial məsuliyyət hissini gücləndirir.
İctimai təşəbbüslərin sosial siyasətdə rolu çox əhəmiyyətlidir. Belə ki, insanlar öz problemlərinin həllinə şəxsən qatılmaqla, dövlət orqanları ilə əməkdaşlıq edir və daha şəffaf, demokratik idarəetmənin formalaşmasına töhfə verir. Cəmiyyətin içərisindən gələn təşəbbüslər real tələbatlara əsaslandığı üçün mövcud problemləri daha tez müəyyən edib hədəfli həll yolları təklif edə bilir. Müxtəlif sosial qrupların birgə fəaliyyəti insanlarda qarşılıqlı etimad və birliyə inam yaradır, bu da sosial sabitliyin əsasını təşkil edir. Qeyri-hökumət təşkilatları və könüllü təşəbbüslər sosial xidmətlərin bir hissəsini öz üzərinə götürməklə dövlətin məsuliyyətini paylaşır və resurslardan daha səmərəli istifadəni təmin edir”.
Onun sözlərinə görə cəmiyyətin fəal üzvləri tərəfindən irəli sürülən ideyalar sosial siyasətə innovativ həllər gətirə bilər: “İctimai təşəbbüslər sosial siyasətin mühüm tərkib hissəsidir. Onlar dövlətlə vətəndaş arasında körpü rolunu oynayır, sosial rifahın təminində qarşılıqlı məsuliyyəti gücləndirir və cəmiyyətin davamlı inkişafına təkan verir. Dövlətin bu təşəbbüsləri dəstəkləməsi — hüquqi, maliyyə və institusional mexanizmlərlə — sosial siyasətin effektivliyini əhəmiyyətli dərəcədə artırır”.
