Yeni Azərbaycan Partiyası (YAP) Ağdaş rayon təşkilatı fevralın 9-da Milli Məclisə keçiriləcək növbədənkənar seçkilərlə bağlı yanvarın 17-də 90 saylı Ağdaş Seçki Dairəsindən namizədliyi YAP tərəfindən irəli sürülmüş partiyanın Ağdaş rayon təşkilatının sədri Cavid Osmanovun təbliğat-təşviqat kampaniyası çərçivəsində Ağdaş şəhər seçiciləri ilə ilk görüş keçirib.
Görüşdə təbliğat-təşviqat qrupunun üzvü, YAP Ağdaş rayon təşkilatı Qadınlar Şurasının sədri Tənzilə Şıxıyeva çıxış edərək qarşıdan gələn parlament seçkiləri haqqında məlumat verib, eyni zamanda seçkilərlə əlaqədar indiyədək həyata keçirilmiş proseslərdən, eləcə də Cavid Osmanovun Milli Məclisin deputatı olduğu ötən dövr ərzində göstərdiyi fəaliyyətdən söz açıb.
Həyat və fəaliyyəti haqqında məlumat verən Cavid Osmanov daha sonra ölkə Prezidenti cənab İlham Əliyevin respublikamızda həyata keçirdiyi uğurlu daxili və xarici siyasətdən, Azərbaycanın Birinci vitse-prezidenti Mehriban xanım Əliyevanın təhsilin, mədəniyyətin, səhiyyənin, idmanın inkişafı, ölkəmizlə bağlı həqiqətlərin dünyada təbliği, xalqımızın maddi-mənəvi dəyərlərinin yenidən dirçəldilməsi, onların qorunub saxlanılması, dünya xalqlarının mədəniyyətlərinə inteqrasiyası istiqamətində gördüyü işlərlərdən danışıb. Cavid Osmanov, həmçinin Milli Məclisin deputatı olduğu müddətdə Ağdaş rayonunda yaşayış məntəqələrinin qazlaşdırılması, kənd yollarının yenidən qurulması, şəhərin daxili küçələrinin təmir edilməsi və s. kimi məsələlərin həlli istiqamətində görülmüş işlərə toxunaraq qeyd edib ki, rayonun inkişafı üçün bundan sonra da davamlı olaraq işlər görüləcək.
Görüşdə ilk dəfə səs verəcək seçici Tənzilə İsgəndərova, seçicilərdən Zülfiyyə Soltanova, İlqarə Rüstəmova, Mais Məhərrəmov, Xəyalə Rüstəmova çıxış edərək qeyd ediblər ki, ölkəmizdə və Ağdaşda görülən işlər, həyata keçirilən layihələr hər bir vətəndaşın gözü önündə baş verir. Bütün bunlar isə Sədri cənab Prezidentimiz İlham Əliyev olan Yeni Azərbaycan Partiyasının uğurlu siyasətinin nəticəsidir. Çıxış edən seçicilər bütün bunlara görə 9 fevralda keçiriləcək parlament seçkilərində Yeni Azərbaycan Partiyasının namizədi Cavid Osmanova səs verəcəklərini bəyan ediblər.
Sonda Cavid Osmanov seçiciləri maraqlandıran sualları cavablandırıb.
