“Azərlotereya” ASC 2023-cü il üçün hesabatını açıqlamır. Şirkətin maliyyə gəlirləri ilbəil fantastik şəkildə artır.
Sabahinfo.az xəbər verir ki, bunu jurnalist Samir Feyruzov sosial şəbəkə hesablında yazıb.
“Deyək ki, bu, yaxşı haldır. Məsələn, 2022-ci ildə “Azərlotereya” ASC-nin ümumi gəlirləri 258 milyon 163 min manat olub. Həmin il üçün xalis gəlir 41 milyon manat hesablanır” deyən S.Feyruzov 2021-ci il üçün ASC-nin ümumi gəlirlərinin 43 milyon 969 milyon manat olduğunu qeyd edib. Onun sözlərinə görə, ASC-nin idarəetməsi Türkiyənin “Demirören Holdinq”in törəmə müəssisəsi olan “YMT Sans B.V.” şirkətinə veriləndən sonra təxminən 6 dəfə artım əldə olunub.
“Xalqın talan edilməsi hesabına əldə olunan yüz milyonlarla gəliri bir tərəfə qoyaq, deyək ki, bu, qumar deyil, sadəcə mərc oyunudur və bütün bunlar yaxşı haldır, büdcəyə milyonlarla vergi ödənilir.
Amma “Azərlotereya” ASC ümumi gəlirlərini açıqlasa da, Azərbaycanda media orqanlarına ayırdığı pulların məbləğini açıqlamır. Maraqlıdır, nə üçün?”
ASC-nin 2022-ci il hesabatında “reklam və marketinq xərcləri”nin 11 milyon 865 min manat olduğunun qeyd edildiyini vurğulayan S.Feyruzov əksər sayt və qəzetlərlə əməkdaşlıq müqaviləsi bağlayan “Azərlotereya” ASC-nin həmin media orqanlarına ayda nə qədər pul köçürməsi ilə maraqlanır:
“11 milyon 865 min manat vəsaitin neçə faizi saytların və qəzetlərin payına düşür? “Azərlotereya” ASC-nin idarəetməsi Türkiyə şirkətlərinə həvalə olunsa da, nəticədə dövlət qurumudur.
Yaxşı olar ki, həmin media qurumlarının rəhbərləri “Azərlotereya” ASC-dən ayda nə qədər pul aldıqlarını qeyd etsinlər. Bu, şəffaflıq nümunəsi sayıla bilər. Gizli və qara iş görmürsünüsə, o zaman bunu açıqlamaqda da problem görmürəm”.
