“Müstəqillik dövrünün 1280 MVt gücündə ən böyük İstilik Elektrik Stansiyasının 2025-ci ildə açılışı olduqdan sonra Mingəçevirin Azərbaycanın elektroenergetika mərkəzi kimi önəmi daha da artacaq. Bu hadisə ölkəmizin enerji potensialını böyük dərəcədə gücləndirməklə yanaşı, həm də Mingəçevir şəhərinin Qafqazın elektroenergetika mərkəzi kimi yeni dövrünün başlanmasına da təkan verəcək”.
Bunu Sabahinfo.az-a Yeni Azərbaycan Partiyası Nizami rayon təşkilatının sədri Ramil Vəlibəyov deyib.
Ramil Vəlibəyov bildirib ki, Mingəçevirdə fəaliyyət göstərən elektrik stansiyası bu gün ölkəmizin elektrik enerjisinə ehtiyacının böyük hissəsini ödəyir: “Xatırlatmaq yerinə düşər ki, 1976-cı ildə Ulu Öndər Heydər Əliyevin rəhbərliyi və təşəbbüsü ilə Mingəçevirdə böyük elektrik stansiyasının təməli qoyulub və sözügedən stansiyanın birinci blokunun açılışı 1981-ci ildə Ümummilli Liderimizin iştirakı ilə olub. Bu səbəbdən də bu gün tamamilə haqlı olaraq bildirilir ki, Mingəçeviri Qafqazın enerji mərkəzinə çevirən Ulu Öndər Heydər Əliyev olub. Təsadüfi deyil ki, Mingəçevir Elektrik Stansiyası müstəqilliyimizin ilk illərində də ölkəni elektrik enerjisi ilə təmin edib, respublikamızın nəinki enerji, hətta sənaye potensialının da böyük hissəsini ödəyib. Mingəçevir Elektrik Stansiyasının ölkəmizin ümumi inkişafında rolu nəzərə alınmaqla, 2018-ci ildə onun yenidən qurulması prosesi də başlanıb. Beləliklə də, 2020-ci ildən stansiya 2400 meqavat generasiya gücü ilə fəaliyyətini davam etdirib”.
Ramil Vəlibəyov əlavə edib ki, ölkəmizdə elektroenergetika sahəsi son illər ərzində çox sürətlə və uğurla inkişaf edib: “Son 20 il ərzində Azərbaycanda 34 elektrik stansiyası inşa edilib ki, bu stansiyaların da generasiya gücü təqribən 3400 meqavata bərabərdir. Hazırda isə Azərbaycanın ümumi generasiya gücü 7200 meqavatdır. Heç şübhəsiz ki, 1280 MVt gücündə ən böyük İstilik Elektrik Stansiyasının inşasının başlanması da Azərbaycanın enerji təhlükəsizliyinə verilən növbəti töhfə olmaqla yanaşı, yüzlərlə yeni iş yerlərinin yaranmasına səbəb olacaq. Eyni zamanda, yeni tikiləcək stansiyada ildə 1 milyard kubmetr qaza qənaət edilməsi isə Avropanın enerji təhlükəsizliyinə növbəti töhfə olacaq”.
