“İstilik təchizatı qurumunun durumu bizi narahat etməlidir”

Sabahinfo.az xəbər verir ki, bunu Milli Məclisin bu gün keçirilən plenar iclasında deputat Zahid Oruc deyib.

Deputat bildirib ki, Xətai rayonunda müşahidə edilən çətinliklər ölkəmizdə yeni tikililərlə bağlı vahid normativlərin müəyyən edilməsinin vacibliyini göstərir:

“Hər yeni bina və ya çoxbloklu yaşayış massivlərində qazanxana sistemi mütləq şəkildə qurulmalıdır. Bu, ümumi istilik təminatında sabitliyi və effektivliyi təmin edə bilər”.

Zahid Orucun sözlərinə görə, hazırda istilik təchizatı qurumunun mərhələli şəkildə ləğv olunması ilə bağlı məlumatlar var:

“Əgər biz ölkə üzrə yüz minlərlə kombi quraşdırmaq üçün şərait yaradırıqsa, bu, gələcəkdə ciddi problemlərə səbəb ola bilər. Təkcə indiki dövrdə deyil, enerji keçidi və enerji səmərəliliyi baxımından da bərpa olunan enerjinin ev təsərrüfatlarına inteqrasiyası zamanı biz 100 minlərlə kombinin utilizasiyası ehtiyacı ilə üz-üzə qalacağıq. Bu isə həm iqtisadiyyata, həm də ekoloji mühitə zərər vuracaq”.

Deputat Hökumətin yaxın dövrdə tikinti siyasəti və normativləri sahəsində parlamentlə birlikdə təcili addımlar atacağına ümid etdiyini bildirib.