Slovakiya Azərbaycanın müstəqilliyini 24 yanvar 1992-ci ildə tanımışdır. İki ölkə arasında diplomatik münasibətlər 23 noyabr 1993-cü ildə qurulmuşdur. 18 mart 2004-cü ildə Azərbaycan Respublikasının Prezidenti İlham Əliyev Slovakiya Respublikasına işgüzar səfəri ikitərəfli münasibətlərin genişlənməsində böyük rol oynayıb. Azərbaycan Respublikasının Milli Məclisində 13 dekabr 2005-ci ildən etibarən Azərbaycan-Slovakiya parlamentlərarası əlaqələr üzrə işçi qrupu fəaliyyət göstərir. Slovakiya Respublikasının ölkəmizdə Səfirliyi 1 oktyabr 2019-cu ildən fəaliyyət göstərir. Azərbaycan Respublikasının Slovakiyada Səfirliyi isə 28 iyul 2023-cü ildə təsis edilmişdir.

Mayın 7-də Slovakiya Respublikasının Baş naziri Robert Fitsonun Azərbaycana rəsmi səfəri isə ölkələrimiz arasında əlqaələrin inkişafında mühüm rol oynayacaq. Slovakiya Respublikasının Baş naziri Robert Fitsonun Azərbaycana rəsmi səfəri ilə əlaqədar mətbuata verdiyi bəyanatında Prezident İlham Əliyev səfəri tarixi səfər adlandıraraq Slovakiya-Azərbaycan əlaqələrində yeni səhifə açıldığını bildirdi. Səfər çərçivəsində 3 adda Azərbaycan-Slovakiya sənədlərinin imzalanması əlaqələrin inkişafına əsas yaradır. Bəyanatında Prezident İlham Əliyev qeyd etdi ki, “Azərbaycan Respublikası ilə Slovakiya Respublikası arasında strateji tərəfdaşlığın yaradılması haqqında Birgə Bəyannamə”nin imzalanması əlaqələri ən yüksək səviyyəyə qaldıracaq çox ciddi siyasi sənəddir. Strateji tərəfdaşlıq Bəyannaməsində əks olunan maddələr ölkələrimizin niyyətini əks etdirirməklə bərabər gələcək əməkdaşlığın perspektivlərini də müəyyən edir. İmzalanan digər iki sənəd isə “Azərbaycan Respublikasının Müdafiə Sənayesi Nazirliyi ilə Slovakiya Respublikasının Müdafiə Nazirliyi arasında hərbi-texniki əməkdaşlıq sahəsində Anlaşma Memorandumu” və “Azərbaycan Respublikasının Müdafiə Nazirliyi ilə Slovakiya Respublikasının Müdafiə Nazirliyi arasında müdafiə sahəsində əməkdaşlıq haqqında Saziş”dir ki, bununla da ölkələrimiz birgə istehsal sahələrinin yaradılmasına nail olacaqlar.

Slovakiya Respublikasının Baş naziri Robert Fitsonun Azərbaycana rəsmi səfəri ilə əlaqədar mətbuata verdiyi bəyanatında Prezident İlham Əliyev ölkəmizin qaz ixracına da diqqət çəkdi. Ölkə başçısı vurğuladı ki, Azərbaycan hazırda 8 ölkəyə öz təbii qazını ixrac edir və ola bilsin ki, 9-cu ölkə Slovakiya olacaq. Keçən ilin aprel ayında “Həmrəylik Halqası” adlanan sənəd imzalanmışdır. Bununla da Azərbaycan qazının Slovakiya bazarına da nəqli üçün yaxşı imkanlar yaranmışdır. Azərbaycan öz təbii qazını Avropa məkanına etibarlı yollarla nəql edir. Avropaya təchizat 2021-ci ildəki 8 milyard kubmetrdən bu il 12 milyard kubmetrə qədər qalxacaq. Bu da Azərbaycanın ümumi qaz ixracının 50 faizini təşkil edir. 2027-ci ilin sonuna qədər təkcə Avropa İttifaqı məkanına 20 milyard kubmetr qazın nəql edilməsi məsələsi gündəlikdədir.

Prezident İlham Əliyev bəyanatında diqqətə çatdırdı ki, Azərbaycanda qaz hasilatı artır, yeni yataqlar kəşf olunur və o yataqlarda istismar artıq başlamışdır. Eyni zamanda, ölkəmizin genişmiqyaslı yaşıl gündəliyi də icra edilir və bir çox bərpaolunan külək və günəş enerjisi stansiyalarının inşa olunması qaza qənaət etmək imkanı yaradacaqdır və bu qənaət olunmuş qazın əsas ünvanı Avropa olacaqdır.

Əlişah Rəcəbov,

YAP Ağdaş rayon təşkilatının sədri