"Qazaxıstanda proseslərin məcrası - daha doğrusu, Rusiya ordusu, yaxud, KTMT-nin silahlı birləşmələrinin ölkəyə girəcəyi ssenarisi hadisələrin ilk günündən artıq müzakirə olunurdu. Qazaxıstan müstəqil türk dövlətləri arasında ən iri əraziyə malik, böyük iqtisadi perspektivi olan ölkədir. Eyni zamanda Türk dövlətləri təşkilatının aparıcı həlqələrindən biridir. Habelə, Qazaxıstan Azərbaycan üçün qardaş dövlətdir, ölkələrimiz arasında ciddi iqtisadi və siyasi əməkdaşlıq mövcuddur. Bu mənada Qazaxıstanda baş verənləri təbii olaraq diqqətlə izləyirik".
Bunu Pravda.az-a açıqlamasında Milli Məclisin deputatı Bəhruz Məhərrəmov deyib.
Kollektiv Təhlükəsizlik Müqaviləsi Təşkilatının birgə qüvvələrindən ibarət sülhməramlıların Qazaxıstana daxil olmasına gəlincə, deputat bildirib ki, Qazaxıstan 1992-ci ildən təşkilatın üzvüdür və təşkilatla bağlı öhdəlikləri də könüllü qəbul edib: "Yaxud, ən azı son 30 ildə Qazaxıstan KTMT-dən çıxmağa cəhd göstərməyib, əksinə, təşkilatın aparıcı güclərindən biri kimi rolunu qabartmağa çalışıb. İndi hadisələr fonunda beynəlxlaq hüquqa əsaslansaq, görərik ki, Təşkilat Qazaxıstanın özünün də imzaladığı hüquqi sənədə - KTMT-nin Əsasnaməsinin 3-cü, 7-ci, 8-ci və s. maddələrinə əsasən hərəkət edib. Belə bir məqamda, KTMT sülhməramlıların Qazaxıstana daxil olmasının qardaş qazax xalqı üçün doğru, yaxud, yalnış olması barədə fikir yürütmək, bu cür qiymətləndirmə aparmaq etik və hüquqi olmaz. Bu suveren qazax xalqının seçimidir və qazaxların seçiminə, üstəlik bu seçimin KTMT üzvü olmadığımız üçün bizimlə bir başa əlaqəli olmadığını nəzərə alaraq münasibət bildirilməsini doğru hesab etmirəm. Xüsusən də proseslər fonunda Kollektiv Təhlükəsizlik Müqaviləsi Təşkilatının aparıcı dövlətləri ilə münasibətlərimizə xələl gətirə biləcək məqsədli fəaliyyətdən və açıqlamalardan, o cümlədən müqayisələrdən çəkinməliyik. Proseslərin gedişinə yalnız qazax xalqı və hökuməti münasibət bildirə bilər. Son bir neçə gündə də aydın gördük ki, Qazaxıstanda xalq kütlələri proseslərə də, hökumətin siyasətinə münasibət bildirəcək qədər fəaldır. Bu mənada biz qazax xalqı üçün yalnız və yalnız sülh, sabitlik və rifah arzu edə bilərik".
Nəzrin Cavid