Çimərlik mövsümü başladı. Bakı meri Hacıbala Abutalibov da sərəncam imzalayıb ki, çimərliklər pulsuzdur, icra hakimiyyətləri tərəfindən təmizlik aparılsın. Bu hissəsi gözəl. Amma, bu tip sərəncamlar hər il imzalanır. Dəyişməyən bir şey var. Çimərliklər pulsuz deyil, dənizin yaxşı yerləri hasarlanıb, dəniz sahili çirkab və tullantılar içindədir, o cümlədən mövcud pullu çimərliklər də standartlardan uzaqdır. Çoxu kababxana və qutabxana kimi fəaliyyət göstərir.

 

Bu sözləri ölkədə çimərliklərin fəaliyyətinə, durumuna münasibət bildirən Azərbaycan Xalq Cəbhəsi Partiyasının (AXCP) sədiri Razi Nurullayev deyib. Sədir qeyd edib ki, çimərliklərin əksəriyyəti pulludur, pulsuz olan yerlər isə təmizlik və təhlükəsizlik standartlarına cavab vermir:

"Yaxşı yerlər dənizin içinə qədər hasarlanıb, dəniz boyu bir neçə km getmək istəsən, suyun içindən dolanıb keçməlisən. Təbii ki, özəl mülk sahibləri dənizin özlərinə aid hissəsini təmiz saxlamağa çalışırlar, buna görə də əhali belə yerlərə axışır. Mülk sahiblərini qınamaq da olmur, çünki onların real müştəriləri narahat olur və narazı qalırlar. Günahkar şəhər icra hakimiyyətidir. İctimai çimərlik sahələri çirkab və tullantı içindədir, xidmət yoxdur, təhlükəsizlik təmin edilməyib, yuyunmaq yeri yoxdur, hamam və tualet də olmadığına görə natəmizlikdir. Təbii ki, belə yerə gedən az olacaq, əhali isə az-çox təmizlənən ərazilərə üz tutur ki, bu da dəniz pulsuzdur deyib çimməyə gələnlərlə, özək mülk sahibləri arasında ikitirəlik yaradır”.

 

"Prezident belə sərəncam verdi, məsələ qanuniləşdi, amma problem həll olunmadı. Xəzərin çəpərləyənlər çəpərlərini sökməkdən imtina edirlər” deyən Razi Nurullayev vurğulayıb ki, dəniz xalqındır, qanuna da əməl etmək vacibdir:

"Ona görə də bütün hasarlar ekskavatorla uçurulmalıdır. Şəxsən, kimə aid olub-olmamasından asılı olmayaraq hamısının, həm hasarların, həm mülklərin dağıdılmasının tərəfdarıyam. Əgər hakimiyyət bizə qismət olarsa, söz verirəm ki, ekskavatorun sükanı arxasında özüm əyləşəcəm və "ən bərk gedən" və qanunlara əməl qoymayanın mülkünü uçuracam. Nə məhkəməyə baş vuracam, nə də sorğu soracam. Qoy mənə diktator desinlər. Bu gün bunun edilməsinə ehtiyac var və xalq bunu İlham Əliyevdən gözləyir. Əgər gücü çatmırsa, imzalanan fərman ləğv edilməlidir. Prezident öz nüfuzunu düşünməlidir. Sahil boyu gedən zaman hər tərəfin çirkab və tullantılar içində olduğunun şahidi oluruq. Digər yandan sevinirik ki, turistlər gələcək və Azərbaycan ağ günə çıxacaq. Gələn turist o bir iki gözəl obyektə çatana kimi min yerdə zir-zibil, tullantılar və baxımsızlıq görəcək. İcra hakimiyyətinin işi nədir? Yer satmaq, daha yaxşı Heydər Əliyev mərkəzi tikmək üçün yarışa girmək, parkları söküb təzədən tikmək, etdikləri və törətdikləri pislik və eybəcərlikləri gözlərdən qorumaq üçün yolboyu darıxdırıcı daş hasarlar çəkmək. Əgər hakimiyyət bizə qismət olarsa, xalqa söz verirəm ki, o çəpərləri çəkənlər və xalqa zülm edənlər ən sərt şəkildə cəzalandırılacaq, rüşvət və büdcə oğurluğu ilə yığdıqları varidat son qəpiyinə kimi müsadirə olunacaq. Özləri isə qanunun sərt üzü ilə qalan ömürlərini həbsxanalarda keçirəcəklər. Birmənalı”.

 

AXCP sədiri çimərliklərin standartlarına da toxunaraq bildirib ki, dənizdən çıxan adam elə sahildən bir iki metr aralıda təmiz su ilə yuyunmalıdır, lakin əksər çimərliklərdə bu elementar qaydaya riayət edilmir:

"Yuyunmaq üçün az qala hamam tikiblər və o da dəniz sahilində yox, lap kənardadır. Çılpaq olaraq, yemək yeyənlərin və istirahət edənlərin üstündən aşaraq 50-150 metr məsafəyə getməlisən. Bu sadəcə biabırçılıqdır. Heç 1 ulduz səviyyəsində xidməti olmayan obyekt, oturmaq üçün çətirli dörd stulu 10 Azn qiymətə verir. Bu talançılıqdır. Səbəb ictimai və şəhər icra hakimiyyətinin xidmətlərinin olmamasıdır. Şəhər icra hakimiyyəti şəhər sakinləri üçün şərait yaratmalıdır. Çox yarıtmaz və səbatsız. Çünki, cəzasızlıq var, qorxu yoxdur. Onlara dəmir bir əl, dəmir bir yumruq lazımdır. Çox da turizmdən danışmayaq. Azərbaycana bir dəfə gələn turist bir də gəlməz. Çünki, aldığı xidmətlə xərclədiyi vəsait arasında Himalay dağı boyda problem var. Kbabxana, qutabxana və balıqxana kimi fəaliyyət göstərən mülk sahiblərini asan qazanc və gözə kül üfürmə düşündürür. Çünki, nəzarət yoxdur, edənlər də rüşvətin alıb cibinə qoyur və eybəcərliklərə gözünü yumur. Amma, zaman gələcək və əgər Allah qismət edərsə, o qanunun gücü ilə o gözləri çıxarmağı da bilirik”.sabahinfo.az