Cəmiyyətin tərəqqisində qadının rolu hər zaman mühüm olmuşdur. Ana olaraq ailənin təməlini quran, müəllim olaraq gələcəyin insanını yetişdirən, ictimai xadim kimi isə xalqın inkişafına xidmət edən Azərbaycan qadını əsrlər boyu öz müdrikliyi, qayğıkeşliyi və fədakarlığı ilə seçilmişdir. Belə nümunəvi Azərbaycan xanımlarından biri də ömrünü elmə, təhsilə və insanlara xidmətə həsr etmiş, mehribanlığı, gülərüzlülüyü və yüksək ziyalılığı ilə hər kəsin rəğbətini qazanan Dilarə Cəbrayılovadır.
Müəllimlik peşəsi bütün peşələrin başlanğıcıdır. Çünki müəllim insan yetişdirir, cəmiyyət formalaşdırır, gələcəyin memarı olur. Dilarə xanım da bu müqəddəs peşənin şərəfini daim uca tutmuş, minlərlə şagirdin həyatında silinməz iz qoymuşdur. O, yalnız bilik öyrədən pedaqoq deyil, həm də insanlara yol göstərən, milli-mənəvi dəyərləri aşılayan əsl ziyalıdır.
Azərbaycan Dillər Universitetinin fəlsəfə və ictimai elmlər kafedrasının müəllimi kimi fəaliyyət göstərən Dilarə xanım gənclərin dünyagörüşünün formalaşmasına, onların vətənpərvər ruhda yetişməsinə böyük töhfələr vermişdir. Onun mühazirələri tələbələr üçün sadəcə dərs deyil, həyat məktəbi olmuşdur. Dərin biliyi, yüksək nitq mədəniyyəti və insanpərvərliyi onu həm tələbələrinin, həm də həmkarlarının hörmət bəslədiyi nüfuzlu pedaqoqa çevirmişdir.
Bakı şəhəri 295 nömrəli tam orta məktəbin direktoru kimi fəaliyyəti isə onun təşkilatçılıq qabiliyyətini və təhsilə olan sonsuz sevgisini bir daha nümayiş etdirmişdir. O,rəhbərlik etdiyi məktəbdə sağlam təhsil mühiti yaratmış, müəllim və şagird kollektivində qarşılıqlı hörmət və inam prinsiplərini formalaşdırmışdır. Onun rəhbərliyi ilə məktəb yalnız təhsil ocağı deyil, həm də milli-mənəvi dəyərlərin qorunduğu nümunəvi bir mərkəzə çevrilmişdir.
Xüsusilə vurğulamaq lazımdır ki, Dilarə xanım Nardaran kimi özünəməxsus ənənələri olan bir məkanda qız uşaqlarının təhsilə cəlb olunması istiqamətində böyük xidmətlər göstərmişdir. O, erkən nikahların qarşısının alınması, qızların savadlı və müstəqil şəxsiyyət kimi formalaşması uğrunda yorulmadan mübarizə aparmışdır. Onun təşəbbüsü və əzmkarlığı nəticəsində bir çox ailələr qız övladlarının təhsil almasının vacibliyini dərk etmiş, yüzlərlə qız uşağı məktəbə və elmə bağlanmışdır. Bu isə yalnız bir məktəb rəhbərinin deyil, bütöv bir cəmiyyətin gələcəyini düşünən böyük ziyalının xidmətidir.
Dilarə xanım həm də qayğıkeş ana, mehriban insan, yüksək mənəviyyata sahib Azərbaycan qadınıdır. Onun gülərüzü, insanlarla səmimi münasibəti, köməyə ehtiyacı olanlara dayaq olması hər kəs tərəfindən böyük rəğbətlə qarşılanır. İnsanlara sevgi və diqqətlə yanaşmaq onun xarakterinin ayrılmaz hissəsidir.
Milli Məclisin deputatı və siyasi xadim kimi fəaliyyəti dövründə də Dilarə xanım daim xalqın yanında olmuş, təhsil, qadın hüquqları və gənclərin inkişafı ilə bağlı mühüm təşəbbüslərlə çıxış etmişdir. O, Azərbaycan qadınının ictimai-siyasi həyatda necə fəal və nümunəvi rol oynaya biləcəyini öz fəaliyyəti ilə sübut etmişdir.
Bu gün Dilarə Cəbrayılovanın yubileyi münasibətilə onu böyük ehtiram və sevgi ilə təbrik edir, uzun ömür, möhkəm can sağlığı və yeni uğurlar arzulayırıq. Onun şərəfli ömür yolu gənc nəslə örnək, Azərbaycan təhsilinə və cəmiyyətinə isə dəyərli töhfədir.
Belə ziyalı qadınlar cəmiyyətimizin qüruru, gələcəyimizin işığıdır. Dilarə xanımın həyat yolu sübut edir ki, müəllimlik sadəcə peşə deyil — insan ömrünə nur saçan müqəddəs missiyadır.
Ədil Ədilzadə
Sabahinfo.az
