Payız Üşüyər,üşüdər pəncərəmi də, Gəlməz içəriyə, yadındı payız. Sarı saçlarını töküb çiyninə, İlahi, nə gözəl qadındı payız. Həmişə gözündə yaş saxlayanım, Sənə oxşayıram,gözüm bir əsim. Çağır,çağır gəlim buludun olum, Mənə göylərində yer ver tələsim. Üzünu , gözünü yuyum yolların, Üstünün, başının tozunu alım. Geriyə qaytara bilmədim onu, Barı ayağının izini alım.

*** Gözlərim dar ağacıdı Səndən də döndüm, axır ki, Qürurumu ağ saxladım. Ağlamağa səssiz bir yer, Yazmağa varağ saxladım. Atdım gözümün yaşına, Ömrümü islatdım suda. Bədən ruhun vətəniymiş, Vətənsiz qaçqınmış o da. Səndə nəyim qaldı mənim, Ruhmu? Halal xoşun olsun. Təzə ömründə, günündə Qoy bir də nimdaşın olsun. İndi bütün xatirələr, Gözümdən doğulub düşür. Gözlərim dar ağacıdı, Göz yaşım boğulub düşür.

*** Görüş yerim Görüşünə gəlmişəm, Necəsən, görüş yerim? Tək gəlmişəm, Boylanma yolların ayağına. Sənin dediyin oğlan Çıxmayıb qabağıma. Görüşünə gəlmişəm, Necəsən, görüş yerim? Dəyişmisən. Ağacın da töküb yarpaqlarını, Torpağın yarpaqlayıb. Gözlərimin həsrətini Budaqların ağlayıb. Yaşıl oturacaqlarını Dəcəl aşiqlər cızıb,  A+B yazıb, B+C yazıb. Bu da həmin dayanacaq, Məni yola salan hanı? Bircə addım ayrılmamış, Həsrətimi alan hanı? İndi darıxmırmı, görən, Mənim adımla çağırmır dostlarını, Dili karıxmırmı, görən... Sən ölən görüşlərin Qalan qəbristanlığı. Mənim səadətimin Yalan qəbristanlığı. Görüşündən gedirəm, Salamat qal, görüş yerim. Sən eşqimin ana bətni, Dönüş yerim, dönüş yerim.

*** Məktub Sən də tam ola bilmədin. Tamamlaya bilmədin, Ürəyimin yarim qalan hissəsini... Toxuna bilmədiyi xəyallarını Gözləriylə qucaqlayan Qadınlar var yer üzündə. Müstəmləkə ürəklərin Məhəbbəti böyük olur. Böyük sevgiləri də Böyük ürəklər alır. Sənin ürəyin balaca, Məhəbbətin balaca, Cəsarətin balaca... Sən də tam ola bilmədin. Məni sevmək asan deyil!

*** Gecə saat on iki Axşam çağı küçələr Tərk edilmək üçündü. Üşüyən oturacaqlar Əyninə xəzan geyir. Göy üzündə yarım ay Yarim gecə lampası. Küləklər yelləncəkdə... Aya, ulduza dəyir. Ayrılığın bir ucu Bu sarı qıza dəyir. Sən də getdin, əzizim, Eh! Elə onlar kimi. Elə küçə kimiyəm, Yıxılan yollar kimi. Əllərim çətir olmur, Yanağımı su aparır. Indi sənin xəyalını O aparır, bu aparır. Vəə belə... Oyunun sonu. Gecə saat on iki. Yeni günümdə olma, İtirildi bu sevgi.