Milli Məclisin deputatı Müşfiq Məmmədli SABAHİNFO.AZ saytına müsahibə verib. O müsahibəsində Fransa Senatının qərəzli qətnaməsi, əldə olunan Qələbədən və koronavirusun artım tempindən danışıb.

-Müşfiq müəllim. Fransa Senatının məlum qərəzli qətnaməsi və bu qətnaməyə verilən adekvat cavablar barəsində nə deyə bilərsiniz?

- Fransa Senatının Rəyasətində qəbul edilən "Dağlıq Qarabağ Respublikasının tanınmasının labüdlüyü” adlı qətnamə layihəsi istər beynəlxalq hüquq, istərsə də insanı, haqq-ədalət baxımından  qiymətləndirilsə  qətnamə Azərbaycana və azərbaycan xalqına qarşı haqsızlıqdır. Bu 30 ildə Azərbaycan xalqının çəkdiyi məşəqqətlər, öz doğma yurd-yuvasından didərgin salınmış insanların ağır durumu, onların maddi-mənəvi ağır vəziyyətləri heç bir xüsusən də beynəlxalq hüquqa hörmət edən dövlət nümayəndələrinin demək olar ki, görməzdən gəldiyi, buna sanki belə də olmalıymış kimi durumla qarşı-qarşıya idik. Hər zaman bəyanatlar, yersiz səfərlər və münaqişəni nizama salınması yönündə yeni-yeni təkliflər artıq bizim səbr kasamızı doldurmuşdu.  Azərbaycan tərəfi buna hər zaman etiraz səsini ucaldırdı. Özlərini demokratik adlandıran və ən əsası həmsədr ölkələr bu yöndə heç bir addım atmırdı. Vəziyyət elə həddə gəlib çatdı ki, erməni terroruna dur demək üçün Müzəffər Azərbaycan Ordusu öz öhdəsinə düşən işi şərəflə və QƏLƏBƏ ilə tamamladı. Cəbhədə məğlubiyyətlə barışmayan ermənilər diplomatik sahədə də ciddi yenilgiyə məruz qaldılar. Onlar bununla da barışmaq istəmirlər. İndi onla havadrlarına arxayındırlar. Çox təəssüf ki, ermənilərin havadarı qismində bu gün çıxış edən ölkə Fransadır. Bildiyimiz kimi Fransa həmsədr ölkədir. Həmsədr ölkələrin tərəfsiz olması vacib şərtdir.  Ancaq Fransa nəinki tərəfsiz qalır, eyni zamanda bugün münaqişənin nizama salınması yönündə atılan addımlara kölgə salmağa çalışır. Bütün bunların sonunda onu demək olar ki, qətnamə Azərbaycan və Fransa arasında olan münasibətlərə kölgə salır və bizi adekvat addımlat atmağa məcbur edir. Milli Məclisdə qəbul edilən etiraz bəyanatı yerində atılmış addımdır. Bundan sonra isə bizim müvafiq strukturlarımız lazımı addımlar atacaqdır.

-Makron Azərbaycana qarşı niyə belə bir mövqe sərgiləyir?

-Son 100 illik tarixə nəzər yetirsək Fransa dövləti daim erməni faktorundan istifadə etmə tendensiyası içində olub. Fransa Türkiyəyə müəyyən zərbələrin vurulmasında, hansısa bir ölkədə maraqlarına təhlükə yarandıqda erməni faktorundan istifadə önəmli rol oynayır. Son hadisələrlə əlaqədar olaraq Makronun dünya siyasətində atdığı addımlarda istədiyi nəticəsi əldə etməməsi erməni foktorunun qabardılmasına gətirib çıxarmışdır. Bütün bunlar Fransa kimi bir dövlətə yaraşmır. Fransa beynəlxalq hüquqi riayyət etməlidir. Çünki, o həmsədr dövlətdir və həmsədrliyə görə müəyyən öhdəliyi var. Mən bu məsələyə ümumən Qardaş Türkiyəmizin Prezidenti cənab Rəcəb Tayyib Ərdoğanın dediyi kimi "Fransa Azərbaycanın probleminə Fransız qalmışdır” ifadəsi ilə cavab vermək istəyərdim.

-Bir millət vəkili kimi 44 günlük QƏLƏBƏ gündəliyini necə dəyərləndirərdiniz? 

-Həqiqətən də bütün Azərbaycan xalqı kimi həyatımın ən qürurlu günlərini yaşayıram. Cənab Ali Baş Komandanın rəhbərliyi altında Müzəffər Ordumuz bu QƏLƏBƏni zamanmaqla Azərbaycanın təkcə bu əsrdə yox son 200 ildə məğlubiyyətlərlə müşaidə olunmuş tariximizin o səhifələri qapatdıq. Biz artıq müstəqil, qalib bir dövlətinqalib vətəndaşlarıyıq. Son hadisələrdə mənə qürur verən hadisə ondan ibarətdir ki, qalib orduda xidmət etmiş zabitin qardaşıyam. Mənim qardaşım münaqişə başlayan ilk gündən hərbi əməliyyatlarda Füzuli, Hadrut o cümlədən də Cəbrayıl istiqamətində gedən döyüşlərdə iştirak etmişdir. Mən bu məsələni qabartmaqla onu demək istəyirəm ki, bizim hər birimiz tutduğumuz mövqedən, vəzifədən asılı olmayaraq  xalqımızın azadlıq, Vətən Müharibəsində nəyi bacarırıqsa onu edirik. Çox şükürlər olsun ki, hər birimizin ən əsası bu işdə ən çox əziyyət çəkən Cənab Ali Baş Komandanın atdığı addımlar uğurla nəticələndi. Ərazi bütövlüyümüzü, xalqımızın yaşadığı o əziklik, məğlub durumunu aradan qaldırdıq və hər birimiz Ali Baş Komandanın ətrafında sıx birləşdik. Mən xalqımıza, Ali Baş Komandana, qalib əsgərlərimizə öz xoş arzularımı bildirirəm və sevinc hissi keçirirəm.

-Siz özünüzdə eyni zamanda səhiyyə sahəsində çalışırsınız. Bir millət vəkili kimi səhiyyə və arxa cəbhədə nə kimi işlər görmüsünüz?

-Mən Milli Məclisin Səhiyyə, Təhsil  Komitəsinin üzvüyəm. Həm Səhiyyə Komitəsinin üzvü həm də bir tibb içşisi kimi öhdəmə nə iş düşürsə layiqincə bu işləri yerinə yetirirəm. Bildiyiniz kimi cəbhə ilə yanaşı arxa cəbhədə Azərbaycan koronavirus cəbhəsində də mübarizə aparırdı. Bu gözə görünməz bir düşməndir. Bu xəstəliyin yayılma tendensiyasının artması həyəcan təbili çalmağa vadar edir.  Mən də həm millət vəkili kimi, həm də bir tibb işçisi kimi təbliğat-təşviqat, əhalinin maarifləndirilməsi istiqamətində davamlı işlər görürəm. Səhiyyə sahəsində çalışdığımı müəssisə koronavirusla mübarizə aparan səhiyyə qurumu kimi iştirak etdik. İkinci mərhələdə körpə övladlarımızın sağlamlığının qorunması istiqamətində öz fəaliyyətimizi əsirgəmirik. Bilirsiniz ki, tibb işçilərinin fəaliyyəti 24 saatlıq müddəti əhatə edir. Bu yöndə Sumqayıtda olan həkimlərimizi xüsusi qabartmaq sitəyirəm. Onlar koronavirusun birinci mərhələdə lokallaşdırılmasında böyük rol oynadılar. Hazırda da artım tempi yüksək olduğu üçün bu həkimlər çox gərgin şəkildə fəaliyyət göstərirlər.  Xızı Mərkəzi Rayon Xəstəxanasında nəyə gücümüz çatırsa öz öhdəmizə düşən işləri həyata keçiririk.

-Koronavirusla bağlı indən sonrakı atacağımız addımlar nədən ibarət olmalıdır?

 -Koronavirisla bağlı hökumət öhdəsinə düşən vəzifəni görüb. Aidiyyatı qurumlar da bu istiqamətdə fəaliyyətini davam etdirirlər. Burada əsas məsələ vətəndaş məsuliyyətidir. Vətəndaşlar işlədikləri yerdə, yaşadıqları ərazilərdə və harda olmasından asılı olmayaraq müəyyən olunmuş qaydalara riayyət etməlidirlər. Bildiyiniz kimi presisin ilk günlərində cənab Prezident İlham Əliyevin müvafiq sərəncamı ilə bu yöndə Fond yaradıldı. Kifayət qədər vəsait toplanıldı. Əlavə modul tipli xəstəxanalar tikildi. Eyni zamanda prosesə xaricdən həkimlər cəlb olundu. Birinci vitse-prezident Mehriban xanım Əliyevanın da bu sahədə ciddi fəaliyyəti var. Bir başa Mehriban xanım xaricdən avadanlıqların gətirilməsi və həkim personalının maddi texniki bazasının daha da yüksəldilməsi istiqamətində gördüyü işlər karonavirusla mübarizədə müsbət nəticələrin əldə olmasını şərtləndirib.

-Artım tendensiyasının qarşısını  almaq üçün nə kimi işlər görülməlidir?

-Bütün dünyanı cənginə alan koronavirusla mübarizədə indiki məqamda atılacaq ən mühüm addım Ümumdünya Səhiyyə Təşkilatının müəyyən etdiyi qərarlara uyğun addımların atılmasıdır. Bu nədir? Qoruyucu maskalardan istifadə, əllərin dizinfeksiyası, mümkün olduğu qədər evdən çölə çıxmama, sosial məsafə. Bu amillərə ciddi riayyət olunmalıdır. Hal-hazırda yoluxmaların qarşısını təmamən almaq mümkün deyil. Bizim məqsədimiz odur ki, artım tendensiyasını aşağı salmaqdır. Bu istiqamətdə bütün mümkün tədbirlər də görülür. 

Ədil Ədilzadə